1 Wana kinyemi wausilwe wavu wakwe,

niyo masa yawe yajaligwa.

2 Ana kinyemi yudya hee kuwazwa mwo wiihi ni Zumbe Mnungu,

uyo heena nyambi mwo moyo wakwe.

3 Umwo nandaga hinati nilonge kindedi cho wavu wangu,

nabunt'hikaga kwa kuila msi wose.

4 Kilo na msi noukanisulumiza,

ludole lwangu lwasilaga pele,

nehinda enga mazi yanyazigwe ni zuwa dya kiangazi.

5 Niho nalongaga kindedi cho wavu wangu kwako,

naho hifisile maihi yangu,

nawe niyo wayagubika masa yo wavu wangu.

6 Ivo wahuwilwa wose nawalombeze kwako,

kwaviya weye wiyaho,

umwo malao ya makunt'ho yakalaila,

houdahe kuwakubila.

7 Weye niwe gomela dyangu,

wayakindila makunt'ho yangu.

nounizunguluse mila ya uyokozi.

8 Naho Mnungu agamba, "Nohusigiile na kukuhiniza sila zo komboka,

nohulangilize na kukukaulisa vedi.

9 Usekunda enga falasi hegu nyumbu hezikukombaganya,

zikuunga kulongozwa kwa mikoa na makube niho zikutimile."

10 Mnt'hu mwiihi ana makunt'ho mengi,

mna lukunde lwawazengela gomela wose wa kumhuwila Zumbe Mnungu.

11 Nyuwe wawagilwa, yangeni kwa Zumbe Mnungu,

kwajili ya kiya awatendeleni,

nyuwe mkumwiva yehe yangeni kwa kinyemi.