1 Weye Zumbe Mnungu myokozi ywangu,

miye nakuiila kilo na msi.

2 Unive kiya hulombeza kwako,

nitegeleze hakulombeza wambizi.

3 Higubikwa ni makunt'ho mengi,

naho haluse nihagihi na kubanika.

4 Hinda enga wose wakuita kwe isi ya wabanike,

ludole lwose lunisila.

5 Hijaligwa hamwenga na wabanike,

enga wachinjigwe walambale kwe vikuta

hewe kukumbukilwa naho,

heweemuli mwo udimi wako.

6 Kuniduula kwo mnyongomela,

kwe mwina una ziza dititihale.

7 Maya yako yanizamila

kunizinganiza ne mijubwaniso yako.

8 Kuwatenda wambuya zangu waninyilike,

kunitenda ywa kuihiza kwawe,

hivugailwa kundani hiikudaha kunyilika.

9 Meso yangu hayakukaula vedi

kila zuwa nakuiila weye Zumbe Mnungu,

naho nenula mikono yangu kwako halombeza wambizi.

10 Togola vihungi vako wawalagisa wabanike?

Woho wenuka kwiza kukutogola?

11 Togola lukunde lwako lwabilikizwa kwe vikuta,

hegu uhuwilwa wako watambulwa hant'hu ha ubanangi?

12 Vihungi vako vamanyika kwe diziza,

hegu uwedi wako kwe isi ijaligwe?

13 Mna miye nalombeza wambizi kwako Zumbe Mnungu,

kila mtondo kulombeza kwangu kwevika kwako.

14 Zumbe Mnungu, nii waniduula hale?

Nii kukefisa hale na miye?

15 Hidugana na masulumizo hagihi na kubanika kukongela ubwanga wangu,

hidugana na wogofi wako niyo nengila chevu.

16 Maya yako yakutisa yanombokela,

wogofi wako unibananga pele,

17 msi wose yanizunguluka enga ugubiko wa mazi,

higubikwa nt'hendelo zose.

18 Wambuya zangu na weyangu wose wanasa,

ziza ditithale dinda nidyo dimbuyangu.