1 Nakwink'ha nt'hogola weye Zumbe Mnungu kwo moyo wangu wose,

nenikeme nt'hogola zako ho undiilo we milungu.

2 Nafunamiza kihanga changu hasi,

hahinga kwe Nyumba yako ikukile,

kwajili yo lukunde lwako holukusila hamwenga no uhuwilwa wako.

Kwaviya kulagisa kugamba dizina dyako ne mbuli zako vikulisa.

3 Umwo nakwitangaga weye wanitikaga

wautondowazaga umoyo wangu kwa kunitenda ninde na ludole.

4 Maseuta wose mwe si nawaditunye dizina dyako,

aho wakeva icho noulonge.

5 Nawakeme ivo adamanye Zumbe Mnungu,

kwaviya un'gazi utendese wa Zumbe ukulisa.

6 Weye Zumbe Mnungu, hata uneva ywi kulanga mwa wose,

mna wawakaulisa wadya hewee kukekweza.

mna awakombaganya kwa hale wose wakukekweza.

7 Umwo nazungulukagwa ni makunt'ho,

wanidimaga vedi,

wayahigaga maya ya wank'hondo wangu,

kwa mkono wako wa kulume wanilihizila.

8 Noudamanye kila kiya ulagane,

lukunde lwako weye Zumbe Mnungu ni lwa mazuwa yose.

Use kuzileka zindima zako ukudamanya.