1 Zumbe Mnungu kaikaila si,

want'hu nawo wazingiza,

kekala mwe viumbwa vina mawawa,

si nayo yasingisika.

2 Uko Sayuni Zumbe Mnungu niye Mkulu

ana nt'hunyo kujink'ha si yose.

3 Kila yumwenga naatogole ukulu wakwe no kutisa kwe dizina dyakwe,

Yehe niye Akukile.

4 Seuta mdahi; waungisa uwagilwa,

uwagilwa kuutenda utoge mwe Izilaeli,

kwigala uzumilwa no uwedi.

5 Mtunyeni Zumbe Mnungu, Mnungu ywetu,

fikeni madi na kufunamiza vihanga venyu aho heviga vakwe,

yehe niye Akukile.

6 Musa na Haluni wandaga mwa walavant'hambiko wakwe,

Samweli naye andaga yumwenga mwa awo wandaga wakamlombeza,

awo wose wandaga wakamlombeza naye niyo aweva.

7 Alongaga nawo kulawa mwe mkola we divunde,

watimilaga imiko ne zisigilizi awenk'haga.

8 Weye Zumbe Mnungu, Mnungu ywetu, wawahitulaga want'hu wako,

wawalagisaga kugamba ni weye Mnungu ukuusila wavu.

Hamwenga na yo wawasulumizaga kwo wavu wawe.

9 Mtogoleni Zumbe, Mnungu ywetu,

mvikeni aho ho mnima wakwe ukukile!

Zumbe Mnungu, Mnungu ywetu kakuka.