1 Weye mkwank'hwalu, nii wakeduvila uwihi wako?

Mna weye ubeligwe ho undiilo wa Mnungu, ni kihi ukukeduvila msi wose?

2 Weye waika mizungu ya ukomi,

nyuwe mna nyambi, ni enga lumo lunoleswe.

lupisi lwose ni want'hu mkudant'ha.

3 Mwaungisa uwihi kujink'ha uwedi,

mwadant'ha na kuleka ukindedi.

4 Waungisa mbuli zose za kuwabananga want'hu,

na lulimi lukudant'ha.

5 Ivo Mnungu naakubanange mazuwa yose,

naakung'ole na kukuusa mwe kaya yako hata uneva hukuunga,

naakuuse mwe isi ya wagima.

6 Wawagilwa nawakaule na kogoha,

nawamseke wakagamba,

7 "Kauleni, yudya hemhuwilaga Mnungu kunda unyilikilo wakwe,

ni yudya ahuwilaga ugoli wakwe,

na kukawiila kukehonyela mwe vint'hu ivo na kunda mdahi kwa kuwakoma watuhu."

8 Mna miye ni enga mti ukwitangwa mzeituni ukukula mwe Nyumba nk'hulu ya Mnungu,

nahuwila mwo lukunde lwakwe lwa mazuwa yose.

9 Weye Mnungu nohutogole mazuwa yose kwa yadya udamanye,

nohutunye ha want'hu wako wahuwilwa,

naho nenidibwelekeze dizina dyako kwa viya ni dyedi.