1 Moyo wangu utogole Zumbe Mnungu,

vose vi mwangu viditunye dizina dyakwe dikukile!

2 We moyo wangu mtogole Zumbe Mnungu,

naho usekujala ukise wose ananawo.

3 Akuusila wavu wako wose,

na kukuhonya manyonge yako yose.

4 Akukombola ugima wako, unasekwingila kwe kikuta,

akuvala nt'hunyo ya lukunde na kukuonela mbazi.

5 Mwo ugima wako awigusa vint'hu vedi viya ukuunga,

ubwanga wako uvuzwe uhya enga wa ndege nyika.

6 Zumbe Mnungu niye akudamanya mbuli za uwagilwa

na usengelo wa kindedi kwa wose wakuhujilwa.

7 Amlagisaga Musa sila zakwe,

na udamanyi wakwe kwa Izilaeli.

8 Zumbe ni mta mbazi na lukunde

hakusunguza kunda na maya

lukunde lwakwe lutendesa.

9 Yehe hi ywa kufank'hila mazua yose,

hana maya ya mazuwa yose.

10 Ivo akukitendela haviligane no wavu wetu,

naho hakulihiza viligane no uwihi wetu.

11 Enga ivo wili uhale utendese we mbingu kulawa kwe si,

nivo vili lukunde lwakwe kwa wose wakuvika,

12 enga ivo vili vipangane hale ulailo wa zuwa na usweelo wa zuwa,

nivo akuusila hale wavu ulawe mwetu,

13 enga ivo eli tate akuwaonela mbazi wanawe,

nivo eli Zumbe kwa wose wakumwogoha,

14 kwaviya kamanya ivo kiumbigwe,

akumbukila kugamba suwe kilawa mwe nt'hifu yo ulongo.

15 Wikazi wetu mwe si ni enga mani,

yekala enga mabwali ya kwe nk'honde,

16 nk'hung'unt'ho yakung'unt'ha niyo yakeagila,

hant'hu hakwe hahaoneke naho.

17 Mna kwa wadya wakumvika Zumbe Mnungu, lukunde lakwe ni lwa mazuwa yose

naho uwedi wake lwekala vyeleko na vyeleko,

18 kwa wahuwilwa wose we ndagano yakwe,

na wakutimila zisigilizi zakwe.

19 Zumbe Mnungu kaika difumbi dyakwe kwe mbingu,

yehe niye seuta ywa vint'hu vose.

20 Mtogoleni Zumbe nyuwe watumigwa wakulu wa kwe mbingu,

nyuwe wadahi mkuzitoza zisigilizi zakwe;

mkutegeleza yadya akulonga.

21 Mtogoleni Zumbe Mnungu nyuwe fyo dyose dya kwe mbingu.

Nyuwe wandima wakwe mkutenda yadya akuunga.

22 Nyuwe watumigwa vakwe wakulu wa kwe mbingu wose, mtogoleni Zumbe

kila hant'hu mwo useuta wakwe.

Weye moyo wangu mtogole Zumbe.