1 Zumbe Mnungu Atunywe!

Nenimtunye Zumbe Mnungu kwa moyo wangu wose,

ho mdugano wakumogoha Mnungu.

2 Ni za kweheela ndima za Zumbe Mnungu,

wose wakwelelwa nazo nawaunge kuzikombaganya.

3 Kila kiya akudamanya kimema ukulu na nt'hunyo,

uwagilwa wakwe ni wa mazuwa yose.

4 Mbuli zakwe za kwehela kazitenda zikumbukilwe.

Zumbe ana ukise na mbazi,

5 awenk'ha nk'hande wose wakumvika,

akumbukila indagano yakwe mazuwa yose.

6 Kawalagisa want'hu udahi we zindima zakwe,

kawenk'ha isi ya want'hu wa isi nt'huhu.

7 Ndima zose akudamanya ni uhuwilwa na uwagilwa,

sigilizi zakwe zose ni za kukawiilwa.

8 Ni za uhuwilwa mazuwa yose,

zitimilwe kwa uhuwila naho kwa uwagilwa.

9 Kawegaila want'hu wakwe ulekelwa,

asigiilaga indagano yakwe ulo naulo.

Yehe kakuka naho atisa.

10 Kumvika Zumbe ni chotoko cha mzungu,

wose kutimila zisigilizi zakwe wabala.

Nt'hunyo zakwe ni za mazuwa yose.