1 Zumbe Mnungu unitegeleze ivo hulombeza,

uive indilo yangu unambize!

2 Usekuleka kunikaula,

umwo handa na makunt'ho,

unitegeleze,

hakwitanga usunguze kunink'ha uhituzi.

3 Kwaviya wikazi wangu watazuka enga mosi,

mavuha yangu yakweela enga moto wa nunda.

4 Moyo wangu wahuma, unyuluka enga mani,

hikukeiva hata kudya nk'hande.

5 Kwajili yo kuugula kwangu,

nk'handa yangu ikenamatiza mwa mavuha.

6 Hinda enga kungwi dya kwe nyika,

enga kungwi mwa mahame.

7 Nacheleza meso,

hinda enga kadege ike mnanga mwe nyumba.

8 Wank'hondo wangu wanibela msi wose,

wose wakuniihiya wanibela na kuniligita.

9 Maivu yanda niyo ink'hande yangu,

masozi yangu yakehanganya na mazi yangu yo kunywa,

10 kwajili ya maya yako yatendese,

kuninula niyo waniduula.

11 Wikazi wangu ni enga kizuli,

enga mani yanyaile.

12 Mna weye Zumbe Mnungu, ywi seuta ywa mazuwa yose,

nt'hunyo zako zagendeela vyeleko vose.

13 Nowinuke na kuionela mbazi Sayuni,

habula hokumlagisa uwedi wako,

lupisi lwe kindedi lubula.

14 Kwaviya wandima wako wayazumila maiwe yakwe,

hamwenga na kugamba yamoligwa,

wamuonela mbazi hata uneva kanda mahame.

15 Want'hu wose nawamwogohe Zumbe Mnungu,

maseuta wose wa si nawogohe ukulu wakwe,

16 umwo Zumbe Mnungu akauzenge uhya Sayuni,

niyo akelaviliza mwo ukulu wakwe,

17 umwo neeve kulombeza kwa wakiwa,

naawategeleze kulombeza kwawe.

18 Ino iwandikwe kwajili ye cheleko kikwiza,

vileke wadya nawelekwe weze wamtunye Zumbe Mnungu.

19 Kwaviya Zumbe Mnungu kakaula kulawa hakukile hakwe he kulanga,

kaisungiila isi kulawa uko kwe mbingu,

20 vileke eve kuugula kwa wavugailwa,

na kuwalekela awo wasengelwe kukomwa.

21 Ivo dizina dya Zumbe Mnungu dibwelekezwe uko Sayuni,

ne zint'hunyo zakwe uko Yelusalemu,

22 aho mafyo ya want'hu yakeza kukeduganya hamwenga,

no useuta ukeza kumvika Zumbe.

23 Anihungulaga ludole umwo handa mwe sila,

autendaga wikazi wangu unde mguhi.

24 Nenigambe, "Weye Mnungu ywangu use kuniusa

handa hinati nikule,

weye Zumbe Mnungu wekala vyeleko na vyeleko.

25 Aho nk'hongo waumbaga si,

zimbingu nazo ni ndima ye mikono yako.

26 Ivi nevagiile mna weye ni ywa mazuwa yose,

nevisakale enga valo,

nouvisakanye enga suke,

navo nevize viusigwe.

27 Mna ni weye ni uyudya mazua yose,

wikazi wako hauna uheelo.

28 Wana wa wandima wako nawekale,

welekwa wawe nawande wadahi."