1 Mtunyeni Zumbe Mnungu,

kwaviya ni vedi kumkemela Mnungu ywetu, kwaviya ni kwedi kutunya naho kwa wagila.

2 Zumbe Mnungu aizenga naho Yelusalemu,

awavuza want'hu wekwe kulawa kwe samo.

3 Awalagula walumizwe miyoyo yawe,

awa zinganiza vitambala mwe zink'wenge zawe.

4 Kaziwaza zint'hondo,

niyo azitambula mazina ywe kila imwenga.

5 Zumbe ywetu ni mkulu naho mta udahi utendese,

ukombaganyi wakwe hauna uheelo.

6 Awenula wakukeseleza,

mna waihi awakinya mpaka hasi.

7 Mkemeleni Zumbe kwa kumtogola,

mtoweleni mazeze Mnungu ywetu.

8 Ulanga augubika kwa mavunde,

aitenda fula inye mwe si,

niyo mani yahota mwe milima.

9 Ayenk'ha makala nk'hande yawe,

na makinda ya makungulu yakaila.

10 Yehe hakuonela kinyemi ludole lwa falasi,

hegu kubwedezwa ni viga va watowani wadahi,

11 mna awabweda wadya wakumwogoha,

wakuika mhuwi wawe mwo lukunde lwakwe holwiina uheelo.

12 We Yelusalemu mtunye Zumbe!

Mtogole Mnungu ywako weye Sayuni!

13 Ayatogeza madanga ye nk'hili yako,

na kuwavikila awo we mndani yo lukandula lwako,

14 akwink'ha utondowazi kwe mihaka yako,

naho awegusani na ngano yedi.

15 Asigiila mbuli mwe si,

naho kiya alongile chasunguza kulaila.

16 Anjaza ibalafu enga sufi,

mnyuzu nawo enga maivu,

17 egala fula ya maiwe enga mp'halamba,

hahali akudaha kufinyiliza imp'heho yakwe!

18 Naho egala mbuli yakwe niyo ya lungulumka,

egala nk'hung'unt'ho niyo mazi yaseela.

19 Ulosi wakwe kamwink'ha Yakobo,

malagizo ne miko yakwe kwa Izilaeli.

20 Ayo hayadamanye kwa want'hu wa isi nt'hutu,

hawaumanyize umwiko uno.

Mtunyeni Zumbe Mnungu!