1 Ni mbuli yedi ya kumtogola Zumbe Mnungu,

na kukukemela nt'hunyo weye Mnungu ywa kulanga.

2 Kubwelekeza mtondo lukunde lwako holukusila,

no uhuilwa wako aho nekilo,

3 kwa ukemi wa zeze na sindamgunda,

na maizwi dya kinubi.

4 Kunitenda ninde na kinyemi kwa udamanyi wako mkulu weye Zumbe,

nenizikemele kwa kwanga zindima zako zose udamanye.

5 Udamayi wako ukulisa weye Zumbe,

fanyanyi zako ni lufyambo lukulise.

6 Mnt'hu mhezi hakudaha kulufyambula,

heiina ubala hakudaha kukombaganya.

7 Want'hu hiwawagilwa nawande wapati,

naho wakudamanya yaihile nawapatise,

mna uheelo wawe ni kubanika pele.

8 Mna weye Zumbe kukuka mazuwa yose.

9 Kwaviya wank'hondo wako weye Zumbe, nawabanike,

naho wakudamanya uwihi nawamwaganiswe.

10 Kunink'ha ludole enga jeku dya mbogo,

kunivikila kwa kunink'ha kinyemi.

11 Hiona ukutoigwa kwa wank'hondo wangu,

naho hiva ndilo kwa wadya wakudamanya uwihi.

12 Wawagilwa nawatime enga mtende,

nawande enga ziti dikwitangwa muelezi wa uko Lebanoni,

13 wanda enga maziti yahandigwe mwe nyumba ya Zumbe

nawagendeele kukula mwe Nyumba ya Zumbe Mnungu.

14 Nawande na cheleko hata wakadalahala,

mazuwa yose nawande wateke na usula mwingi,

15 wakabwelekeza kugamba Zumbe ni muwagilwa.

naho niye digomela dyangu hediina wiihi.