1 Ni vedi kwa mnt'hu yudya akuwakaula wakiwa,

Zumbe Mnungu naamuyokole mwo lupisi lwa makunt'ho.

2 Zumbe Mnungu naamwamile na kumuyokola ugima wakwe,

naho naavikilwe mwe isi,

Mnungu haamleke mwa wank'hondo wakwe.

3 Zumbe Mnungu naamwambize umwo akanda mnyonge

naho naamhonye unyonge wakwe.

4 Naho niyo nagamba, "Miye name univikile Zumbe Mnungu,

unionele mbazi kwaviya hikutendela wavu."

5 Wank'hondo wangu walonga vihile mwangu wakagamba,

"Naabanike ini vileke zina dyakwe dijaligwe?"

6 Umwo wakanitalamkila walonga mbuli nyingi,

wakaduganya maihi mwangu,

umwo wakabula kuse wawabwelekezele watuhu.

7 Wose wakuniihiya watakamizana mwa miye,

wakanifanyanyila yaihile ya kunibananga,

8 wakagamba, "Maine aya nayamkome

naho heenuke mwo lusazi."

9 Hata mbwiyangu namhuwile mwo moyo wangu,

uyo nadile naye nk'hande,

kanihituka na kuunga nibanikilwe.

10 Zumbe Mnungu unionele mbazi,

unink'he uwedi na miye nilihize kikoda.

11 Ivo nenimanye kugamba miye nakwelela,

wank'hondo wangu wanase kukeduvya mwangu.

12 Weye kunihuwila kwaviya nadamanya uwedi,

naho waniika hako mazuwa yose.

13 Atunywe Zumbe Mnungu, Mnungu ywa Izilaeli,

kukongela ivi haluse, na mazuwa yose! Taile! Taile!