1 Weye Zumbe Mnungu unitegeleze ukulombeza kwangu,

unive aya hulombeza kwa uhuwilwa wako,

unink'he uhituzi kwa uwagilwa wako.

2 Usekunigela mwo usengelo wako,

kwaviya hahali yeyose muwagilwa mta ugima ho undiilo wako.

3 Kwaviya mnk'hondo anikulumbuza,

anisigint'hila hasi,

anitenda nikale mwo lwiza viligane na wadya wabanikaga aho kale.

4 Naivo miye hifa chevu,

moyo wangu wingila kinyulu na kogoha.

5 Miye nakumbukila mazuwa ya kale,

nafanyanya zindima zako zose,

nakaula zindima izo wadamanyaga.

6 Nachulula mikono yangu kwako halombeza,

moyo wangu wakuonela nk'hilu enga sanga inyaile.

7 Sunguza kunihitula we Zumbe Mnungu,

moyo wangu uhwa,

use kukefisa hale na miye,

nnase kunda yumwenga ywa wadya wakuita kwe isi ya wabanike.

8 Kukanda mtondo nigaile mbuli ya lukunde lwako holukusila,

kwaviya mhuwi wangu wi kwako

unilagise sila ya kutimila,

naho kwako niko niikile dikawiilo dyangu.

9 Zumbe Mnungu niyokole mwa wank'hondo wangu,

nanyilikila kwako vileke unifise.

10 Nihinize kudamanya yakukwelela,

kwaviya weye niwe Mnungu ywangu,

muye ywako uywedi anilongoze mwe isi ya nt'hindiga.

11 Kwajili ye dizina dyako weye Zumbe Mnungu niyokole,

niyokole mwa makunt'ho yangu kwa uwedi wako.

12 Uwabanange wank'hondo wangu kwa lukunde lwako holukusila,

wakome pele wose wakunigela makunt'ho,

kwaviya miye ni mndima ywako.