1 Ikindedi Mnungu ni ywedi kwa Izilaeli,

kwa wose wata mioyo yedi.

2 Mna miye nehiteela,

nihinda hagihi na kwazaganya mhuwi wangu.

3 Kwaviya nehawaonela finju wakukefenya,

nize nione wata wavu wanda wapati,

4 kwaviya woho hawakubwiilwa ni masulumizo,

miili yawe ni yedi, naho ina ludole.

5 hawakubwiilwa ni makunt'ho ya want'hu,

hawakupata makunt'ho enga ayo yakuwapata want'hu watuhu.

6 Naivo elo wefenyi kwawe ni enga mkufu wa mwe singo,

wakevala mbuli za kukekweza.

7 Mioyo yawe yalava wiihi,

fanyanyi za kutenda wavu mwawe hazina uheelo.

8 Wawabela watuhu na kuwalonga vihile,

wakeduvya na kuika mizungu ya kuwalumiza watuhu.

9 Wamlonga Mnungu vihile ne milomo yawe,

naho kwa milosi yawe waikaila isi.

10 Hata want'hu wa Mnungu wawatimila,

na kuhuwila kila kint'hu icho wakulonga.

11 Wagamba, "Mnungu hakuona,

Mnungu Mkulu haabunk'hule."

12 Ivo nivo weli want'hu waihile,

wana kila kint'hu naho wapatisa.

13 Togola, hiwiika moyo wangu kunda ywedi bule,

na kukeyamila nise kudamanya wavu?

14 Msi mgima miye hipata makunt'ho

hinda hasulumizwa kila mtondo.

15 Name nalongile enga woho,

hegu name nehinda msezengi.

16 Nize nigeze kufanyanya zimbuli izi

nehiziona zanigele kiyangayanga,

17 mna nize ningile hakukile ha Mnungu,

niho nabunk'ule uheelo wawe.

18 Ikindedi wawaika hant'hu hakuteela,

wawatenda wagwe niyo wabanangwa pele.

19 Wetukila wabanangwa pele,

wauswa pele kwa kutiswa.

20 Zumbe, weye ukenuka woho wasunguza kwaga,

yanda enga sozi ya mnt'hu akwinuka mwe zint'hongo.

21 Aho nize nione usungu mwo moyo wangu,

naho moyo wangu wize ugelwe kinyulu,

22 nehinda enga mhezi hiina ubala,

naho nehinda enga kala ho undiilo wako.

23 Mna hata ivo mazua yose ni hamwenga na weye,

kunitoza mkono wangu.

24 Wanilongoza kwa kunilangiliza,

naho nounihokele kwo ukulu wako.

25 Miye ni ani mtuhu uko kwe mbingu uneva hi weye wikedu?

Naho kwaviya nna weye naungai naho mwe isi ino?

26 Mwili wangu no moyo wangu vadaha kudunduga,

mna weye Mnungu niwe ludole lwangu na upasi wangu mazuwa yose.

27 Wose akepagule kwako nawasile pele,

nouwabinde wose hiwahuwilwa kwako.

28 Mna miye ni vedi ninde hagihi na Mnungu,

Zumbe Mnungu kanda niye unyilikilo wangu,

nenibwelekeze mbuli zose udamanye!