1 Weye Zumbe Mnungu, seuta ana kinyemi kwaviya kumwink'ha ludole,

kwaviya kumtenda mhumi.

2 Kumkint'hizila yadya akuunga mwo moyo wakwe,

kumzumila yadya akulombeze.

3 Kwaviya nokumhokela kwa kinyemi kikulu,

naho kumvala taji ya zahabu yedi mwo mtwi wakwe.

4 Akulombezaga ugima, nawe niyo wamwink'ha,

mazuwa yabindile ingi mazuwa yose.

5 Nt'hunyo yakwe ikula kwa wambizi wako,

weye kumwink'ha nt'hogola na ukulu.

6 Ikindedi kumvikila mazuwa yose,

wamtenda ange kwa kinyemi cha undiilo wako.

7 Kwaviya seuta kamhuila Zumbe,

kwa lukunde holuukusila lwa Zumbe Mnungu haasingisike.

8 Mkono wako nouwagwile wank'hondo wako wose,

naawatahe wose wakumwihiya.

9 Akabwiilana nawo,

nawande enga wokigwa mwe nunda yo moto.

Zumbe naawabinde pele kwa maya yakwe,

niyo moto wawatikinya taka.

10 Naawakome welekwa wawe mwe isi,

na wana wawe mwa want'hu.

11 Wakaika mizungu na minyanyiko ya kukuhiga,

woho hawabule hohose.

12 Kwaviya nouwatise niyo wakunyilika,

nouwataile ne misale yako.

13 Weye Zumbe Mnungu chakutunya kwo ukulu wo ludole lwako,

naho nekikeme niyo chatogola udahi wako.