1 Nyumba yako ina utana uwo,

weye Zumbe Mnungu mta udahi.

2 Miye nna nk'hwina kwikala mwo mzengwe we Nyumba ya Zumbe Mnungu.

naho moyo no mwili wangu wose wakema kwa kinyemi,

na kumuwangila Mnungu mta udahi.

3 Hata machole yose yapata ukalo,

mbayumbayu nazo zizenga masasa yao uumo,

ziwanguila makinda yawe uumwo

hagihi ne kilingo chako

weye Zumbe Mnungu ywo udahi,

Mnungu ywangu, Seuta ywangu.

4 Wana kinyemi wose wakwikala mwe nyumba yako,

mazua yose wakukukemela mila ya nt'hunyo.

5 Kinyemi ni chawe wadya wakupata ludole kulawa kwako,

wakumunk'hilwa kuita kwo mnima wako Sayuni, kwa kukutunya.

6 Wakomboka mwe dikolongo dinyaile dya Baka,

wadihitula kunda hant'hu ha nc'hoko,

naho fula za vuli zafukula makawa ya mazi.

7 Wagendeela kupatisa ludole,

naho nawamuone Mnungu ywe milungu uko Sayuni.

8 Weye Zumbe Mnungu ywo udahi, nitegeleze kiya hukulombeza,

Weye Mnungu ywa Yakobo unive.

9 Weye Mnungu, umvikile seuta ywetu,

seuta uyo umsagule.

10 Kwikala zuwa dimwenga mwe Nyumba yako,

ni vedi kujink'ha kwikala mazua alufu hant'hu hatuhu.

Nivedi vitendese nandile mwamizi ywo mzengwe ye Nyumba ya Mnungu,

kujink'ha kwikala kwe zinyumba za want'hu waihile.

11 Zumbe Mnungu niye ung'azi wetu utendese na nk'hindo yetu,

akivikila kwa yedi na nt'hunyo

hakuwanyima vint'hu vedi,

kwa wose wakudamanya yakwelela.

12 Weye Zumbe ywo udahi, wana kinyemi wose wakukuhuwila.