1 Mkemeleni kwa kinyemi Zumbe Mnungu nyose mno uwagilwa,

mwangileni kwa yadya adamaye Zumbe Mnungu,

mwink'heni nt'hogola nyuwe mkutimila yadya yakumwelela.

2 Mtogoleni Zumbe Mnungu, mtoeleni mazeze,

mkemeleni mila kwa kutowa zeze dina nyuzi.

3 Mkemeleni wila mhya,

mtoeleni kinubi kwa umanyi niyo mwanga kwa kinyemi.

4 Mbuli ya Zumbe Mnungu ni ya kindedi,

naho yose akudamanya ni uhuwilwa.

5 Zumbe Mnungu aungisa uwagilwa no uwedi,

lukunde lwa Zumbe Mnungu holwiina uheelo, lumemeza isi.

6 Mbingu ziumbwa kwa ulosi wa Zumbe Mnungu,

zuwa, mnenge, ne zint'hondo ni kwa kiya alongile.

7 Kaziduganya zibahali zose hant'hu hamwenga,

mina ye bahali kaivugaila mwe zimp'hako za mazi.

8 Si yose zimwogohe Zumbe Mnungu,

want'hu wose we si mtunyeni yeye.

9 Alongaga niyo vanda,

kwa mbuli yakwe kila kint'hu kilaila.

10 Zumbe Mnungu ausa miyanyiko ya want'hu wa si,

ausa ne mizungu yawe.

11 Mna mizungu ya Zumbe Mnungu ni ya mazuwa yose,

naho yadya akuunga hayana uheelo.

12 Wana kinyemi awo, Mnungu ywawe akanda ni Zumbe Mnungu,

want'hu awasagule mwenye kunda wakwe.

13 Zumbe Mnungu akaula aha hasi kulawa kulanga,

yehe awaona want'hu wose.

14 Kulawa kwe difumbi dyakwe dyo useuta akaula uku hasi,

awaona wose wakwikala mwe si.

15 Uyo niye aumbile miyoyo ya want'hu wose,

kamanya kila kiya want'hu wakudamanya.

16 Seuta hakupata uhumi no ukulu we difyo dyakwe dya watowani,

naho mtowani mdahi hakukombolwa nu ludole lwakwe lukulu.

17 Falasi za nk'hondo hazikwigala uhumi,

naho ludole lwawe lukulu halukudaha kuyokola mnt'hu.

18 Zumbe Mnungu awakaula wadya wakutenda viya akuunga,

wadya wakuhuwila lukunde lwakwe lwa mazuwa yose.

19 Vileke awayokole ne file,

mwo msimo we digumbo.

20 Suwe chamkawiila Zumbe Mnungu,

yehe niye wambizi wetu na nk'hindo yetu.

21 Mwa yehe suwe kina kinyemi,

kwaviya chahuwila mwe dizina dyakwe dikukile.

22 Weye Zumbe Mnungu, lukunde lwako helwiina uheelo lwikale mwetu,

kwaviya suwe chakuhuwila weye.