1 Nakutunya weye Mnungu, use kunyamala,

2 kwaviya want'hu waihile na walulimi wanikump'hukila,

walonga mbuli za kudant'ha mwa miye,

3 waniziga mbuli ziihile,

wanihamant'ha haheina masa.

4 Icho wakuniliha kwa lukunde lwangu, ni kunilongeleza,

hata ivo miye nawalombezela ayedi.

5 Hamwenga na ayo waniliha wiihi kwa uwedi,

waniihiya kwajili yo lukunde lwangu.

6 Sigiila mwiihi yumwenga awahige wank'hondo wangu,

mlongelezi naakimale kwa udahi.

7 Akasengelwa aoneke kunda na masa,

kulombeza kwakwe kumgele mwe dilema.

8 Mazuwa yo wikazi wakwe nayahunguke,

mnt'hu mtuhu aguhe hant'hu ho ulongozi wakwe.

9 Wanawe nawande wana nk'hiwa,

mkaziwe naye ande abanikilwe ni mgosi.

10 Wanawe wangadike wakanda vilombezi,

waguluswe wamlawe mwa mahame wekalaga.

11 Mnt'hu akumtigiza naaguhe vose ananavo,

upati wakwe noutahigwe ni wata kwiza.

12 Asekuona uwedi kulawa kwa yeyose,

hegu kumuonela mbazi mwana nk'hiwa ywakwe.

13 Welekwa wakwe nousile pele,

mazina yawe yasekuoneka mwe cheleko kikwiza.

14 Zumbe Mnungu akumbukile wiihi wa wakale wakwe,

naho use kuusa wavu wa nine.

15 Mazuwa yose Zumbe akumbukile wavu wawe.

mazina yawe yajaligwe mwa want'hu.

16 Kwaviya alemelaga kunda na mbazi,

awasulumizaga na kuwakoma

wakiwa na heweina kint'hu na mnt'hu aswesile wambizi.

17 Aungisa kuligita, aligitwe mwenye,

Hakuunga kuvikila, naye asekuvikilwa.

18 Maligito yandaga enga valo dyakwe,

ligito nedimwingile mwo mwili enga mazi,

na mwa mavuha yakwe enga mavuta.

19 Ligito dinde enga kavaligwa suke nt'hali,

enga mkowa umzinganize mwe kigudi.

20 Zumbe, walihe ayo wank'hondo wangu,

awo wakunilonga vihile.

21 Mna weye Zumbe Mnungu nambize enga ivo unilagane,

uniyokole kwajili yo uwedi wo lukunde lwako.

22 Kwaviya miye ni mkiwa hiina kint'hu,

naho moyo wangu ulumizwa.

23 Nomboka enga kizuli cha kisingi,

napuputiswa enga sige.

24 Mavindi yangu yasokela kwa kufunga,

mwili wangu ubunt'hikisa.

25 Hinda mnt'hu wa kubeligwa,

wakaniona wasingiza mitwi yawe.

26 Weye Zumbe Mnungu ywangu nambize,

niyokole viligane no lukunde lwako holwiina uheelo.

27 Want'hu nawamanye kugamba ni weye mdahi,

Zumbe Mnungu uyadamanye aya.

28 Wakaligita weye vikila,

wakahamant'ha, wagele soni,

naho mndima ywako ange.

29 Wasezengi wangu wavaligwe uhuza,

soni zinde nidyo divalo dyawe.

30 Nenimtogolese Zumbe Mnungu kwa mnomo wangu,

nenimtunye mwo mdugano wa want'hu.

31 Yehe akimala kulume kwa heweina kint'hu,

ayokole ugima wawe kulawa kwa wadya wakuwaziga masa.