1 Miye nanyilikila kwako weye Zumbe Mnungu,

nnase kwingila soni,

uniyokole kwa uwagilwa unanawo.

2 Unitegeleze uniyokole,

unde unyilikilo wangu,

gomela ditogile dya kuniyokola.

3 Ni weye unyilikilo na wamizi kwangu,

unilongoze na kunamila kwajili ye dizina dyako.

4 Uniyokole ne mitego wanitegele,

ni weye unyilikilo wangu.

5 Miye nakeika mwo udimi wako,

uniyokole weye Zumbe Mnungu,

Mnungu mhuwilwa.

6 Miye nawaihiya wadya wakuvika mahili kunda milungu,

Mna miye namhuwila Zumbe Mnungu.

7 Nenionele kinyemi na kwanga,

kwajili yo lukunde lwako,

kwaviya wayaona masulumizo yangu,

kuyamanya makunt'ho yangu.

8 Weye huwalekile wank'hondo wangu wanihume,

kunink'ha ulekelwa wa kuita kudya huunga.

9 Zumbe Mnungu, unionele mbazi,

meso yangu yasokela kwa kinyulu,

hisiilwa pele ni ludole.

10 Miye hisokezwa ni kinyulu,

heiye, wikazi wangu kwa kuila,

ludole lwangu lubindwa kwajili yo wavu,

mavuha yangu nayo yasokela.

11 Wank'hondo wangu wose wanibela,

naho vitendese ni kwa wa hagihi na miye,

wambuya zangu nao waniona mnt'hu ywa kutisa,

kikadugana mwe zisila waninyilika.

12 Wanijala enga mnt'hu abanike,

hinda enga nyungu ya muufi itulike.

13 Naweva want'hu wakatakamizana,

va kutisa, kila hant'hu,

walangilizana,

wakaika mizungu ya kunikoma.

14 Mna miye nakukawiila weye du Zumbe Mnungu,

nagamba, "Weye ni we Mnungu ywangu!"

15 Wikazi wangu wose nadimwa ni weye,

uniyokole nifose mwa wank'hondo wangu,

mwa wadya wakunongola.

16 Unikaule mndima ywako kwa wedi,

uniyokole kwa lukunde lwako holwiina uheelo.

17 Usekunileka hageligwa soni weye Zumbe Mnungu,

kwaviya miye hinyilikila kwako,

wageligwe soni want'hu waihile,

wekale kinyamaile kwe isi ya wabanike.

18 Milomo ya wakudant'ha inyamale,

wakulonga kwa weduvi kwa want'hu wahuwilwa,

want'hu wakukefenya na kukekweza.

19 Uwedi wako weye ubinda wingi,

uwo uwaikile wahuwilwa wako,

kwa kila amanyize ivo wili ywedi,

haaone wiihi, wose wakukuhuwila weye.

20 Wawadima vedi haheina wiihi ho undiilo wako,

hale na mizungu iihile ya want'hu,

wawafisa hant'hu hedi,

kuse na milosi ya wasezengi.

21 Zumbe Mnungu atogolwe,

yehe nakakilagisa lukunde lwakweheela,

aho natemangizwe enga mzi ukump'hukilwe.

22 Miye nehyogohesa niyo nagamba,

"Nakelava ho undiilo wako!"

Mna kumbe waivaga indilo yangu,

aho nakwitangaga kwa wambizi.

23 Muungeni Zumbe Mnungu want'hu wakwe wose mkukile,

Zumbe Mnungu awadima wahuwilwa,

mna awasulumiza wose wakukeduvya kwa yadya yawawagile.

24 Mnde wadahi na kukegela moyo,

nyose mkumhuwila Zumbe Mnungu.