1 Weye Zumbe Mnungu, wahige wadya wakuhigana na miye,

naho watowe wadya wakutowana na miye.

2 Uguhe nk'hindo zako,

wize unambize.

3 Inula mjungo ne majabia yako,

uwahige awo wakunitimila,

ulagane kugamba niweye nouniyokole.

4 Wagelwe soni na kinyulu,

wose awo wakuunga wanikome,

wavuzwe kunyuma kwa kwazaganywa,

wose wakuniikila mizungu ya wiihi.

5 Wande enga mabunt'hi yakwinulwa ni mp'heho,

umwo wakakulumbuzwa ni mtumigwa ywa Zumbe Mnungu.

6 Sila yawe inde lwiza na kuteela,

umwo mtumigwa ywa Zumbe Mnungu akawakulumbuza.

7 Kwaviya waninikila lwinika haheina lema,

haheina dyodyose nibanage, wanisimbila luka nihubugile.

8 Ubanangi uweziile kipump'ha,

wagwilwe mwo lwinika wawe wenye,

naho wahubugile mwe diluka dyawe wasimbile.

9 Name nenimwangile Zumbe Mnungu,

nenione kinyemi kwaviya kaniyokola.

10 Nenimgambe Zumbe Mnungu kwo moyo wangu wose,

"Hahali yeyose enga weye

wawagombela wasokezi kwa wata ludole,

watowanila wakiwa kwa wahoki."

11 Walonga uwona heweina mbazi walundumka,

wanilongeleza kwa mbuli heziihali.

12 Waniliha maihi kwa ayedi nidamanye,

niyo name nanda hiina ludole.

13 Mna miye navalaga magunia kwa kinyulu umwo woho wakanda wanyonge,

nakesulumizaga kwa kufunga,

miye nalombezaga kwa kufunamiza mtwi hasi,

14 nangadikaga uko na uko enga nehawahongezela wambuya zangu na wandugu zangu,

naho enga mnt'hu akuhongeza file ya nine.

15 Wose wandaga na kinyemi miye handa na makunt'ho,

naho niyo wanizunguluka waka nitendela lubezo,

watakwiza nawo wanitowaga

haheina kuleka.

16 Wandaga enga want'hu hewe mmanyize Mnungu,

wanitendelaga lubezo, wanihomolaga na kuniihiya.

17 Zumbe, nouyakaule aya mpaka ini?

Niyokole mwa kunikump'hukila kwawe,

uniyokole kulawa mwe zisimba izo.

18 Name nohutogole mwo mdugano mkulu,

nohutogole ha want'hu wengi.

19 Usekuwaleka wank'hondo wangu wakeduvye kwangu,

awo wakuniihiya haheina masa,

vileke waonele kinyemi makunt'ho yangu.

20 Kwaviya milosi yawe hiyo ya utondowazi,

woho wabwelekeza mbuli za lulimi kwa want'hu wakwikala vedi mwe isi.

21 Wanilongeleza kwa kubongeela,

wakagamba, "Kimuona suwe wenye akadamanya ayo!"

22 Zumbe Mnungu kuiona mbuli iyo,

ivo elo usekunyamala ,

naho usekunda hale na miye.

23 Inuka weye Zumbe Mnungu ywangu unigombele,

wize weye Zumbe Mnungu ulamule amasa yangu.

24 Haya sengela weye Zumbe Mnungu ywangu mwo uwagilwa wako,

naho usekuwalekela wank'hondo wangu wakaonela kinyemi makunt'ho yangu.

25 Use kuwalekela wakakegamba,

"Haluse kaheza,

ivi nivo nekikaunga ande!"

26 Woho wagelwe soni na kwaganika,

wakuona kinyemi kwaviya nakunt'ha,

wagubikwe ni soni na kinyulu,

na wose wakukeona kunda wedi kujink'ha miye.

27 Wande na kinyemi na kwanga,

wadya wakwelelwa nu uwagilwa wangu,

nawalonge mazuwa yose, "Zumbe ni mkulu

akwelelwa ni uhumi wa mndima ywakwe."

28 Name lulimi lwangu nolulonge uwagilwa wako,

naho nohutunye msi wose.