1 We Zumbe, niyokole mwa want'hu waihile,

namile na want'hu makwank'walu.

2 Waika mizungu ya wiihi kila zuwa,

naho waika mizungu iihile mwe mioyo yawe,

3 zinyimi zawe zalubutula enga nyoka,

usungu wa nyoka mifune imwe milomo yawe.

4 Zumbe uniyokole mwe mikono ya want'hu waihile,

unamile mwa want'hu makwank'walu,

wakuika mizungu ya kunikinya.

5 Wakuketogola waninikila mitego,

watega imitego yawe,

mitego yawe kila hant'hu mwe sila hwombokela.

6 We Zumbe nakugamba, "Ni weye Mnungu ywangu."

Wive izwi dye ndilo yangu unionele mbazi.

7 Weye Zumbe Mnungu, udahi wo uyokozi wangu,

kunink'ha wamizi mwe dizuwa dye nk'hondo.

8 Zumbe, waihile usekuwenk'ha yadya wakuunga,

nyambi zawe zise kukint'ha wanase waketogole.

9 Wank'hondo wangu wabanangwe,

uwihi we milomo yawe uwauiye wenye.

10 Nk'hala za maiwe ye moto ziwakupukile,

waduulwe kwo moto kwe dibome tali, wanase kufosa naho!

11 Wakuwaziga weyawe mbuli, wasekunda na kint'hu mwe si,

uwihi uwongole wakwank'hwalu na kuwabananga.

12 Zumbe, miye himanya weye wamila uwagilwa wa wakiwa,

naho wawagombela heweina kint'hu.

13 Ikindedi, wawagilwa nawatunye dizina dyako,

wahuwilwa nawekale ho undiilo wako.