1 Ho! We Mnungu, we Mnungu nii kunasa?

Uyokozi wangu nii ukanda hale nawo

ne milosi yangu yo kulabila?

2 We Mnungu ywangu, hikwitanga nomsi,

mna hunitike,

hikwitanga nekilo

mna hione lwedi.

3 Mna hata ivo weye kukuka naho kwikaila difumbi dye kiseuta,

ni weye nt'hogola ya Waizilaeli.

4 Wakale wetu wakuhuwila weye,

wakukawiilaga niyo wawayokola.

5 Wakwitangaga niyo wawayokola,

wakuhuwilaga niyo hawaone soni.

6 Miye hiye mnt'hu, miye ni kadudu du,

hibeligwa na kugelwa soni.

7 Wose wakunikaula wanitendela lubezo

wanibekuila milomo wakasingisa mitwi yawe.

8 Wakagamba, "Nakamkawiila Zumbe Mnungu

haya naamyokole elo,

uneva Mnungu kamwelelwa naamwambize."

9 Ni weye walekaga helekwa haheina wiihi,

naho umwo nandaga katiti ni weye wanidimaga.

10 Miye nehiikwa kwako aho nize ninde du hyelekwa,

kukongela aho mnala anelekaga, weye kunda Mnungu ywangu.

11 Usekunasa hale

kwa viya makunt'ho ye hagihi,

naho hahana mtuhu ywa kunambiza.

12 Wank'hondo wengi, enga majeku wanitemangiza,

wose wanizunguluka,

enga majeku yakulawa kwe isi ya Bashani.

13 Wasama milomo yawe

enga simba ikubuma ikufunc'ha unga inibwant'he.

14 Ludole lwangu lunisiila,

netika enga mazi mwe sanga,

mavuha yangu yose yatigint'hika,

moyo wangu nawo enga nt'ha ikulujuka.

15 Ludole lwangu lunyala enga kazae,

lulimi nalo luketozela mwe milomo ya kulanga,

kwaviya kunitambalika mwo luvumbi lwe file.

16 Fyo dya waihi dinitemangiza,

enga makuli mengi yakunibasa,

wanibwant'ha mikono ne viga vangu.

17 Mavuha yangu yose yekuse,

woho wanikont'hoela meso na kunibela.

18 Wapangilana zisuke zangu,

na kutowela simbi mavalo yangu.

19 Zumbe Mnungu ywangu, usekunikaila hale,

weye ludole lwangu sunguza kunizila.

20 Niyokole ne sime ino,

kombola ugima wangu kulawa kwa makuli aya.

21 Niyokole kulawa kwe zisimba izi,

miye hina mwambizi kwa mahembe ya mbogo aya,

wive malombezo yangu.

22 Neniwagambile want'hu wangu kiya udamanye,

nohutogole mwo mdugano wawe.

23 Nyuwe nyose mkumvika Zumbe Mnungu mtunyeni yehe,

welekwa wa Yakobo wose mwink'heni yehe ukulu wakwe,

Nyuwe want'hu wa Izilaeli mvikeni yehe.

24 Kwaviya hakubela na kuona hikint'hu makunt'ho ya wakiwa,

hakuhitukila hale nawo,

yehe awetika umwo wakamwitanga.

25 Mwo mdugano mkulu nohulavile nt'hogola kwa yose udamanye,

nenilave nt'hambiko ho undiilo wa wose wakukuvika.

26 Wakiwa nawadye niyo weguta,

wose wakumtimila Zumbe Mnungu nawamtogole.

Mnungu awenk'heni ugima wa mazuwa yose.

27 Want'hu wa si yose nawamkumbukile Zumbe Mnungu,

kulawa nt'hendelo zose za si nawamuuiye,

vyeleko vose nevimvike yehe.

28 Kwaviya Zumbe Mnungu niye seuta,

yehe ekaila si yose.

29 Wagoli wose mwe isi naweze na kufunamiza mitwi yawe hasi ho undiilo wakwe,

wose wakugojwa ni ifile nawafike madi hakwe,

na wadya wose hewekudaha kuulela ugima wawe.

30 Vyeleko vikwiza nevi mvike yehe,

nevigambilwe zimbuli za Zumbe Mnungu,

31 want'hu hewenati kwelekwa nawagambilwe,

udamanyi wo uyokozi uwo adamanyaga Zumbe Mnungu.