1 Zumbe Mnungu atunywe.

Ditunyeni dizina dyakwe nyuwe wandima wakwe Zumbe Mnungu,

2 nyuwe mkukimala mwe nyumba ya Zumbe Mnungu.

3 Mtunyeni Zumbe Mnungu kwaviya ni ywedi

dikemeleni dizina dyakwe kwaviya ni dyedi.

4 Kwaviya Zumbe Mnungu kakesaguila Yakobo kunda mndima ywakwe,

want'hu wa Izilaeli kwajili yakwe mwenye.

5 Kwaviya himanya kugamba Zumbe Mnungu ni mkulu,

naho Zumbe Mnungu ywetu kawajink'ha milungu yose.

6 Adamanya kila icho akuunga,

kwe mbingu na mwe isi,

mwe bahali ne mina yakwe wose.

7 Niye akuyatenda mavunde yakwele kulawa kwo uheelo we isi

amwekeza lumwemwe hamwenga ne fula,

aleta nk'hung'unt'ho kulawa mwe kindolo chakwe.

8 Awakomaga nt'hula sasu wose uko Misili,

wa want'hu na makala hamwenga.

9 Egalaga vilagiso na mbuli za kweheela kwa weye Misili,

kamsulumiza Falao na na wambizi wakwe wose.

10 Azibanangaga si nyingi

naho akomaga maseuta wana udahi.

11 Sihoni uyo seuta ywa Waamoli,

Ogu seuta ywa Bashani,

na maseuta wose wa Kanaani,

12 isi yawe awenk'haga ukipe,

ukipe wa Izilaeli awant'hu wakwe.

13 Zina dyako ni dya mazuwa yose Zumbe Mnungu,

kukumbukilwa kwako ni kwa vyeleko na vyeleko.

14 Zumbe Mnungu naawatowanile want'hu wakwe,

naawaonele mbazi wandima wakwe.

15 Milungu ya si nt'huhu idamanywa kwa masawa na zahabu,

itakudamanywa ni want'hu.

16 Ina milomo mna haikulonga,

ina meso mna haikukaula,

17 ina magutwi mna haikwiva

mwe milomo yawe du haina muye.

18 Wose waidamanye wakeiga nayo,

ni hamwenga na awo wakuihuwila.

19 Mtunyeni Zumbe Mnungu nyuwe want'hu wa Izilaeli,

nyuwe walavant'hambiko mtunyeni Zumbe Mnungu!

20 Nyuwe Walawi mtunyeni Zumbe Mnungu,

mtunyeni nyuwe nyose mkumvika!

21 Mtunyeni Zumbe Mnungu uko Sayuni,

uko Yelusalemu kwo ukalo wakwe.

Mtunyeni Zumbe!