1 Weye moyo wangu mtogole

Zumbe Mnungu ywangu weye ywi mkulu kujink'ha wose,

kuvala ung'azi utendese na ukulu,

2 kukegubika ung'azi enga valo,

zimbingu kuzikuzumbula enga hema,

3 na kuizenga kaya yako mnanga mwa mazi,

na kuyatenda mavunde yande gali dyako,

kukwikala mnanga mwa mawawa ya mp'heho ikukung'unt'ha.

4 Wautenda nk'hung'nt'ho enga wegala ulosi wakwe,

ndilija za moto kunda watumigwa wa kwe mbingu.

5 Aizengaga si mwe zink'hongelo zakwe,

haikudahika kuuswa mazuwa yose.

6 Waigubikaga si kwa bahali,

mazi ye mnanga mwe milima mitali.

7 Mna amazi yanyilikaga aho wize uyafank'hile,

izwi dyako dikwinga lukuwa mazi yanyilikaga.

8 Yaselaga mwe milima,

niyo yaseleza kwa makolongo uko wayaikilaga.

9 Waikaga mihaka heyekudaha kwomboka,

yase kuigubika si naho.

10 Azitenda nc'hoko zitile mazi kwa makolongo,

mazi yakubwiluka mwe milima.

11 Numo yakunywa makala yose ye mwe mbago,

mp'hunda za kwo luwala nuko zikubindila zink'hilu zawe.

12 Madege ulanga yazenga vyaila mnk'handa mwa mazi.

13 Womela mazi mwe si kulawa kwe milima yako,

naho waigusa si kwa ndima zako ukudamanya.

14 Atenda mani yahote nk'hande ya makala ye hengi,

ne vihandwa enga ludyo lwa want'hu,

15 ne divai ya kutondowaza miyoyo ya want'hu,

mavuta ya zeituni yakutelemeza zink'handa zawe,

mikate nayo ya kuwagela ludole.

16 Maziti ya Zumbe Mnungu yomeelwa vedi

miti ya mielezi ya Lebanoni iyo aihandile.

17 Numo madege yakuzenga vyaila vawe,

nk'holongo nazo zazenga masasa mwa maziti yakwitangwa misonobali.

18 Ngulugulu zekala mwe milima mitali,

unyilikilo wawe ni mwe zinyasi.

19 Kudamanya mnenge ukupanga misimo,

zuwa nadyo dimanya lupisi lwakwe lwo usweelo.

20 Kwigala ziza niyo kwanda nekilo,

makala mbago yose yafosa.

21 Simba zabuma zikongola,

zazungula nk'hande zikwink'higwa ni Mnungu.

22 Zuwa dikasomoka, nazo zakeitila,

na kutambala kwe zimp'hanga zawe.

23 Niho want'hu nawo waita kwe zindima zawe,

kwo udamanyi wawe mpaka kisingi.

24 Zumbe Mnungu kudamanya vint'hu vibindile wingi,

kuvidamanya vose kwa mzungu

si imema viumbwa vako.

25 Iyuko uko bahali nk'hulu naho izangalamkise,

umwo mkwikala viumbwa vibindile wingi,

vina ugima vikulu na vidodo,

26 mashuwa na meli zagenda zaita na kuuya,

hamwenga na Eliatani umuumbile asezige uumwo.

27 Vose ivo vakukawiila weye

uvink'he ludyo lwawe, aho vikaunga kudya.

28 Wavink'ha niyo vadya,

wavink'ha nk'hande niyo veguta.

29 Huna vikaule vengilwa ni wogohi,

unavihoka umuye wako vaswesa ugima,

vauya mwo luvumbi.

30 Mna unavink'ha muye wako,

wegala ugima mhya mwe si.

31 Ukulu wa Zumbe Mnungu wikale mazuwa yose,

Zumbe Mnungu naaonele kinyemi zindima zakwe adamanye.

32 Uyo akuikaula si niyo yasingisika,

akuikwafa milima niyo yalava mosi.

33 Nenimkemele Zumbe Mnungu wikazi wangu wose,

Nenimkemele Mnungu ywangu mwa mazuwa yo wikazi wangu.

34 Kufanyanya kwangu kumwelele yehe,

haona kinyemi mwa yehe.

35 Want'hu wata wavu nawabanangwe pele mwe si,

want'hu waihi wasekugendeela,

mtogole Zumbe Mnungu.