1 Zimbingu zabwelekeza ung'azi utendese wa Mnungu,

ulanga nawo walagisa zindima izo adamanye.

2 Zuwa dya dielo dyalonga na zuwa dya luvi,

kilo cha haluse chalonga na kilo kikwiza.

3 Hauhali ulosi ukwivika ukalongwa,

hegu izwi dyodyose kwivika.

4 Mna du izwi dyawe dyevika kwe zi isi zose,

ne zimbuli zakwe zibula uheelo wa si.

Mnungu kadiikila dizuwa hant'hu ha kwikala mwo ulanga. 5 Uko nuko dikutont'homoka enga sekilozi akufosa kwe chumba chakwe,

enga mnt'hu mta udahi akutimila sila yakwe.

6 Dyatont'homoka kwo ulailo wakwe,

niyo dyaita mpaka kwo usweelo wakwe,

hakihali nekinyilike mbwikanizo wakwe.

7 Sigilizi za Zumbe hazihungukilwe,

kwaviya zegala ugima mhya,

miko yakwe ni ya kuhuilwa,

yawenk'ha mizungu wose wahungukilwe.

8 Sila za Zumbe Mnungu zina uwagilwa,

na wose wakuzitimila wana kinyemi,

sigilizi zagela ung'azi mwa meso,

zakink'ha kukombaganya.

9 Ni vedi kumwogoha Zumbe Mnungu,

ni mbuli ikukile ya mazuwa yose,

usengelo wa Zumbe Mnungu ni wa kindedi,

uwo ni uwagilwa.

10 Ni ya yombe kulu kujink'ha zahabu nt'hana,

zina mwiile kujink'ha mwile wa uki,

uki ukulawa mwe kivuna.

11 Mwa uwo miye nakanywa,

kuyatimila ayo kuna geleko kulu.

12 Mna niani akudaha kubunk'hula mbuli za kifiso?

Weye Zumbe Mnungu uniusile wavu wangu wa kinyele.

13 Umdime mndima ywako asekudamanya wavu kwa kasidi.

Usekuzumila ayo yanikaile,

niho neninde ywedi,

naho heninde na masa.

14 Yadya hulonga ne zifanyanyi zangu zizumilwe ni weye,

Zumbe, unyilikilo naho myokozi ywangu.