1 Weye Mnungu Zumbe ywangu, nohutunye,

nenidivike dizina dyako mazuwa yose.

2 Nohwink'he nt'hogola kila zuwa

na kuditunya dizina dyako mazuwa yose.

3 Zumbe Mnungu niye mkulu ywa kutunywa,

ukulu wakwe hauku kombaganyika.

4 Udamanyi wako noutunywe ni vyeleko vose.

nawabilikize mbuli nk'hulu udamanye.

5 Neniusimuile ukulu no udahi wako,

nenifanyanye ya kweheela ayo udamanye.

6 Want'hu nawasimuile udamanyi wako wa kweheela,

nawaubilikize ukulu wako.

7 Nawakutunye wakakumbukila ukulu wo uwedi wako,

naho wakabwelekeza uwedi wako kwa kinyemi.

8 Zumbe Mnungu ni mta lukunde na mbazi,

hiyo mhufu wa maya, lukunde lwakwe halukusila.

9 Yehe ni ywedi kwa wose,

ana mbazi kwa kila kint'hu akiumbile.

10 Viumbwa vose vakutunya,

want'hu wako wahuwilwa nawakuvikile.

11 Nawasimuile ukulu wo useuta wako,

naho nawalonge mwe mbuli yo udahi wako,

12 vileke want'hu wose nawamanye,

no ukung'ala kwo ukulu wo useuta wako.

13 Weye wekaila mazuwa yose,

useuta wako haukusila.

Zumbe Mnungu ni mhuwilwa mwa malagano yakwe yose,

ni ywedi mwo udamanyi wakwe wose.

14 Zumbe Mnungu awambiza wose wakugwa,

awenula awo wagwele hasi.

15 Meso ya viumbwa vose yasinya kwako kwa kawiilo,

nawe wawenk'ha nk'hande kwa lupisi lukuungwa.

16 Wakunjula mkono wako kwa ukise,

kila kint'hu kigima wakink'ha ivo kikuunga.

17 Zumbe Mnungu ni muwagilwa mwe zisila zakwe zose,

naho mhuwilwa kwa kila icho ukudamanya.

18 Zumbe Mnungu he hale na wose wakumwitanga,

wakumwitanga kwa uhuwilwa.

19 Wose wakumvika awenk'ha yadya wakuyaunga,

aiva indilo yawe niyo awayokola.

20 Yeyose akumuunga, yehe amwamila,

mna waihi naawabanange.

21 Nenimtunye Zumbe Mnungu mazuwa yose,

viumbwa vakwe viditogole dizina dyakwe dikukile mazuwa yose.