1 Mtogoleni Zumbe Mnungu kwaviya ni ywedi,

lukunde lwakwe ni lwa mazuwa yose.

2 Wadya wakombolwe ni Zumbe wasimuile aya,

wadya wose wayokolwe.

kiwahonyani kulawa mwo udahi wa wank'hondo wenyu,

3 naho kawavuzani kulawa isi za hale,

kulawa ulailo wa zuwa na usweelo wa zuwa, kwa mwenye mzi na kwa mkoma mahanya.

4 Wose wangadikaga mwe dijangwa,

hawonaga sila ya kuwavuza kwo mzi wa kwikala.

5 Wandaga na sala na nk'hilu,

naho wazehukaga.

6 Niho wamwiilaga Zumbe kwajili ya makunt'ho yawe,

naye awayokolaga mwa masulumizo yawe.

7 Awombosaga mwe sila ichumile

yawabuzaga kwo mzi wo kwikala.

8 Kwa lukunde lwakwe holwiina uheelo,

kwa mbuli za kweheela awadamanyile,

9 kwaviya awanywesa wata nk'hilu,

na kuwegusa wata sala kwa vint'hu vedi.

10 Wadya wekalaga mwo lwiza na ziza ditithale,

wavugailwa nawo mwa masulumizo na minyololo,

11 kwaviya wasagukaga kwe zisigilizi za Mnungu mdahi,

naho walemelaga malagizo yakwe.

12 Awatumagizaga kwa ndima ndala,

wakobadikaga mna hawaonaga ywa kuwambiza.

13 Niho wamwiilaga Zumbe Mnungu,

naye niyo awayokola mwa makunt'ho yawe.

14 Awalavaga mwo lwiza na ziza ditithale,

na kuikant'ha kant'ha minyololo yawe.

15 Nivedi wamtogole Zumbe Mnungu kwa lukunde lwakwe holwiina uheelo,

kwa mbuli za kweheela awadamanyile want'hu.

16 Kwaviya kazibogozola zinyivi ze shaba,

na kuyakant'ha madanga ya kilama.

17 Kusaguka kwakwe kuwatenda wamwenga wande wahezi,

niyo wapata makunt'ho kwajili ya maihi yawe.

18 Haungile kudya nk'hande yoyose,

wandaga haguhi na kubanika.

19 Mwa makunt'ho yawe wamwiilaga Zumbe Mnungu,

niyo yehe awayokola mwo kwangadika kwawe.

20 Awegailaga ulosi wakwe na kuwahonya,

niyo awayokola wasekubanika.

21 Nivedi wamtogole Zumbe Mnungu kwa lukunde lwakwe holwiina uheelo,

na kwa mbuli za kweheela awadamanyile.

22 Wamlavile malavo ya nt'hogola,

na kusimuila zimbuli zakwe kwa kukema.

23 Wakugenda mwe bahali wakanda mwe meli,

wakudamanya ndima zawe mwa mazi mengi,

24 nawo wazionaga zindima za Zumbe Mnungu,

na mbuli za kweheela mwa mazi matali.

25 Kwaviya alongaga niyo nk'hung'unt'ho yalaila,

na kwinula mawimbi ya bahali.

26 Yenulwagwa kulanga kwo ulanga,

naho niyo yaselezwa hasi kwa mazi matali,

27 wakobadikaga niyo wayuga yuga enga akoligwe,

umanyi wawe niyo waluheleza.

28 Niho wamwiilaga Zumbe Mnungu kwajili ya makunt'ho yawe,

naye niyo awayokola mwa makunt'ho yawe.

29 Aunyamaza mjubwaniso,

niyo mawimbi yanyamala.

30 Niho waonaga kinyemi kwaviya yanyamala,

niyo awalongoza kwe bandali iyo waiungisaga.

31 Nivedi wamtogole Zumbe Mnungu kwa lukunde lwakwe holwiina uheelo,

kwa mbuli zakwe za kweheela awadamanyile.

32 Ni vedi wamtunye ho mdugano wa want'hu,

naho wamvike ho undiilo wa wadala.

33 Aitendaga mito inde jangwa,

nc'hoko za mazi kunda hant'hu hanyaile.

34 Isi ina ulozo niyo aitenda kunda ulongo wo munyu heina ndima,

kwajili ya uwihi wa wadya wekalaga uumwo.

35 Ahitulaga dijangwa niyo dyanda makawa ya mazi,

sanga inyaile kunda nc'hoko za mazi.

36 awegalaga wata sala niyo wekala umo,

wazengaga mzi niyo wekala umo.

37 Walimaga nk'honde niyo wahanda mizabibu,

walozolaga ulozo ulozoke.

38 Want'hu wakwe awavikilaga niyo wanda na wana wengi,

mifugwa yawe hayahungukaga.

39 Umwo weze wande wageke na kuhungulwa

ni ukwank'walu, makunt'ho na sungusungu,

40 Zumbe awatendelaga lubezo wakulu wawe,

niyo awatenda wangadike mwe dijangwa hediina ha kombokela.

41 Mna awayokolaga wakiwa kulawa mwa makunt'ho,

agenyezaga zimp'huga zawe enga mafyo ya ngoto.

42 Wawagilwa nawayaone niyo welelwa,

mna waihi wose hawande na dya kulonga.

43 Wata mizungu wose wategeleze zimbuli izi,

walufanyanye lukunde lwa Zumbe Mnungu holwiina uheelo.