1 Zumbe Mnungu, ni weye Mnungu akulihiza,

laila vileke uwasulumize.

2 Weye ukuwasengela want'hu wose,

Laila uwalihe kiya kiwawagile wakukeduvya!

3 Zumbe Mnungu, waihi nawagendeele mpaka ini?

Want'hu hi wawagilwa nawagendeele kukeduvya mpaka ini?

4 Awa walonga milosi ya kukeduvya,

naho wakefenyela wiihi wawe.

5 Weye Zumbe Mnungu, want'hu wako wakomigwa,

wawasulumiza want'hu weli ugoli wako.

6 Wawakoma wabanikilwe ni walume zawe na watakwiza,

na kuchinja heweina tate yawe.

7 Waihi awo wagamba, "Zumbe Mnungu hakuona,

Mnungu ywa Izilaeli hamanyize."

8 Nyuwe wahezi mwa want'hu, fanyanyeni.

Nyuwe wabwalasi, nomnde wabala umwo ini?

9 Togoleni, Mnungu aumbile magutwi yetu haadahe kwiva?

Naho uyo akink'hile ameso hakudaha kuona?

10 Akuwaogola awant'hu asekuwafank'hila?

Akuhiniza want'hu aswesa umanyi?

11 Mnungu kamanya zifanyanyi za want'hu.

Kamanya kugamba fanyanyi zawe hazina dyodyose.

12 Ana kinyemi yudya ukuogolwa ni weye Zumbe,

yudya ukumhiniza zisigilizi zako.

13 Nouwenk'he kinyemi wakalawa mwa makunt'ho,

mpaka aho waihi nawasimbilwe bome.

14 Mnungu haawaleke want'hu wakwe,

haawajale weli wakwe.

15 Usengelo nowomboswe kwa uwagilwa,

naho wata miyoyo yedi nouwelele.

16 Niani akuunga anambize mwa waihi kwajili yangu?

Niani akunga awahige wakutenda uwihi?

17 Yandile Zumbe Mnungu hanambize,

miye hegu nehisunguza kuita kwe isi ya wabanike.

18 Aho nize nigambe, "Nateela."

Lukunde lwako holukusila weye Zumbe,

nulo lunambize.

19 Nize nindilise na kiyangayanga mwo moyo wangu,

weye nokunink'ha utondowazi na kinyemi.

20 Weye hukunda hamwenga na walamuzi wakuhujila,

Wakuzaganya uwagilwa wa want'hu wakamila wiihi wawe,

21 waika mizungu iihile kwa want'hu heweina malema,

na kusengela kukomwa kwa heweina masa.

22 Mna Zumbe Mnungu niye mwamizi ywangu,

Mnungu ywangu niye akunidima.

23 Naawalihize kwa wiihi wawe,

na kuwakoma pele kwa wavu wawe,

Zumbe Mnungu ywetu naawabinde pele.