1 Weye Zumbe Mnungu nakwitanga,

weye mwamizi ywangu usekuleka kunitegeleza,

hunanitegeleze neninde enga ni wadya wakuita kwe isi ya wabanike.

2 Nitegeleze kulombeza kwangu umwo hakuiila unambize,

henuila mikono yangu,

haionyekeza uko kwako kukukise.

3 Usekunikulumbuza hamwenga na want'hu waihile,

awo wakudamanya yaihile,

want'hu wakulonga na weyawe mbuli za utondowazi, q mna mwe mioyo yawe mmema wiihi.

4 Walihe kwa ayo wadamanye,

viligane na maihi yo udamanyi wawe,

wasulumize kwo udamanyi wawe wose,

wenk'he yadya yawawagile.

5 Hawakukumbukila kiya adamanye Zumbe Mnungu,

ne zindima izo atendile,

kwaivo naawasulumize,

na kuwakoma pele mazuwa yose.

6 Ditogolwe zina dya Zumbe Mnungu,

kwaviya keva indilo yangu haunga wambizi.

7 Zumbe Mnungu nuwo udahi na nk'hindo yangu,

miye namhuwila kwa moyo wangu wose,

yehe anambiza naho anitenda nimwangile,

ivo namtogola na mila ya kinyemi.

8 Zumbe Mnungu nulo ludole lwa want'hu wakwe,

amwamila na kumuyokola seuta ywakwe amsagule.

9 Zumbe Mnungu wayokole want'hu wako,

naho wavikile wose unanawo,

unde mdimi ywawe,

uwadime vedi mazuwa yose.