1 Zumbe Mnungu mkumbukile Daudi,

na makunt'ho yose afinyilize.

2 Zumbe kumbukila kiya alaganaga,

ne kilapi akuikilaga weye Mnungu ywa Yakobo mta udahi.

3 "Heniite kaya hegu kwo lusazi,

4 henihumule hegu kukupila,

5 mpaka nihapate hant'hu kwajili ya Zumbe

kaya kwajili ya Mnungu mta udahi ywa Yakobo."

6 Kaula nekiva zimbuli ze Disanduku dye Ndagano uko Efulata,

naho nekidiona uko kwe zink'honde za Yealimu.

7 Chagambaga, "Hake nekiiteni kwe nyumba yakwe

kikafike madi na kinamize vihanga vetu he difumbi dyakwe dye kiseuta."

8 Inuka weye Zumbe Mnungu hant'hu hako ho kuhumula

winuke ne disanduku dyako dyo udahi.

9 Walavant'hambiko wako wadamanye uwagilwa mazuwa yose,

want'hu wako nawo wakeme kwa kinyemi!

10 Walaganaga na mndima ywako Daudi,

usekumlemela uyo umkumbile mavuta.

11 Zumbe amwiikilaga Daudi kilapi che kindedi,

kulagana uko hokukuhituka,

"Nenimtende yumwenga ywa welekwa wako ande seuta,

neeze ande niye mkulu hant'hu hako.

12 Wanawo uneva wananda wakindedi kwe Ndagano yangu,

ne zisigilizi huwenk'ha

wana wawe we kilume nawo weza kunda maseuta hant'hu hako."

13 Kwaviya Zumbe Mnungu kaisagula Sayuni,

kaungisa ekale uumwo.

14 "Aha nihio hant'hu hangu ho kuhumula ulo naulo,

nenikale aaha enga ivo ulongile.

15 Nenihavikile na kuwenk'ha want'hu wakwe kiya wakuunga,

wakiwa wakwe neniweguse na nk'hande.

16 Neniwavikile walavant'hambiko wakwe kwa yose wakudamanya

want'hu wakwe nawakeme na kwanga kwa kinyemi.

17 Aha nenimtende asukile mdahi ywo lukolo lwa Daudi,

enga ivo lukukweela lumuli, nenimtende seuta uyo nimsagule akangale.

18 Wank'hondo wakwe neniwavale soni,

mna yehe neni mvale unga'zi utendese wa kiseuta."