1 Nenimtunye Zumbe Mnungu mazua yose,

nt'huyo yakwe heifose mwo mnomo wangu.

2 Miye nenikeduvile mwa Zumbe Mnungu,

wadya wabeligwe weve naho wande na kinyemi.

3 Nyuwe na miye kibwelekeze kugamba Zumbe Mnungu ni mkulu,

kwa hamwenga kiditunyeni dizina dyakwe.

4 Nalombezaga wambizi kwa Zumbe Mnungu niyo anihitula,

aniyokolaga mwo kogoha kwangu.

5 Wose wakuunga wamkauwiile yehe, nawande na kinyemi,

naho woho hawageligwe soni.

6 Mkiwa amwiilaga Zumbe Mnungu niyo apata uhituzi,

niyo ahonywa mwa makunt'ho yakwe yose.

7 Mtumigwa wa kwe mbingu naawazunguluke wose wakumwiva Zumbe Mungu,

naawayokole mwa maihi yose.

8 Gezeni mmuone Zumbe Mnungu ivo eli ywedi,

wana kinyemi wose wakumhuwila.

9 Mwogoheni Zumbe nyuwe wakukile wakwe,

kwaviya wose wakumwogoha hawahungukilwe ni kint'hu.

10 Simba zahungukilwagwa niyo zalumwa ni sala,

mna wakumwogoha Zumbe Mnungu hawahungukilwe ni chochose chedi.

11 Nyuwe wana, hake soni kwangu mnitegeleze,

neni wahinizeni kumwogoha Mnungu.

12 Togola waugisa ugima,

na kumunk'hila mazuwa mengi naho yedi?

13 kedime usekulonga maihi,

naho mwo mnomo wako msekunda na udant'hi.

14 Usekudamanya yaihile,

zungula utondowazi na kuutimila.

15 Zumbe Mnungu awakaulisa wawagilwa,

naho ategeleza wakamwiila.

16 Mna awahiga wose wakudamanya maihi,

awatenda wajaligwe mwe si.

17 Wawagilwa wakalombeza wambizi,

Zumbe Mnungu awategeleza na kuwayokola mwa makunt'ho yawe yose.

18 Zumbe Mnungu ehagihi na wose wafile chevu,

awambiza waswesile kawiilo.

19 Wawagilwa wandilisa na makunt'ho,

mna Zumbe Mnungu awayokola.

20 Zumbe naawadime vedi,

hakihali chochose nekibanike mwo wikazi wawe.

21 Wiihi wawakoma awo wakuutenda,

wakuwaihiya wawagilwa nawasulumizwe.

22 Zumbe Mnungu aukombola ugima wa wandima wakwe,

wose wakunyilikila kwakwe hawaone masulumizo.