1 Mtunyeni Zumbe kwa viya ni ywedi

lukunde lwakwe ni lwa mazuwa yose.

2 Ni ani akudaha kusimuila mbuli nk'hulu zina Zumbe Mnungu?

hegu kubwelekeza kwa kindedi?

3 Wana kinyemi wose wakutimila imiko yakwe,

na kudamanya yakuwagila mazua yose.

4 Zumbe, unikumbukile miye umwo ukawambiza want'hu wako,

name ninde uumwo ukawayokola,

5 vileke niuwone upati wa want'hu wako,

name ninde mwe kinyemi cha want'hu wako.

hutogole hamwenga na want'hu wako,

6 kidamanya wavu hamwenga na wakale wetu,

kidamanya wiihi na mbuli ziihile.

7 Uko Misili wakale wetu hawakombaganyaga mitendele ya kwehela ya Mnungu.

wandaga wahufu kujala uwedi wakwe ubindile wingi,

wasagukaga kwakwe uko kwe bahali ya Shamu.

8 Hamwenga na ayo awayokolaga viligane na ivo alagane,

vileke alagise udahi wakwe mkulu.

9 Aigambaga ibahali ya Shamu inyale niyo yanyala,

awombosaga umwo mwandaga na mazi matali, enga mwe dijangwa.

10 Awayokolaga kulawa mwa want'hu hewe waungaga,

awakombolaga mwa wank'hondo wawe.

11 Mazi yawagubikiza wank'hondo wawe,

hakwandaga na yeyose asigalaga.

12 Niho wayahuwila kwa ayo alaganaga,

niyo wamkemela kwa nt'hogola.

13 Mna wasunguzaga kujala kiya awatendelaga,

hawaungaga ulangilizi wakwe.

14 Kudya kwe dijangwa wamemaga kumunk'wamunk'wa,

niyo wamgeza Mnungu,

15 ivo awenk'haga kiya walombezaga,

naho awegailaga maine yaihile.

16 Uko kwe nk'hambi awaonelaga finju Musa,

na Haluni wandima wazumilwe ni Zumbe Mnungu.

17 Sanga yagubukaga niyo yawamela Datani,

niyo yawamosa Ibulamu na weyawe,

18 moto wakimp'hukaga mwa wamwenga wa awo wandaga wakawatimila,

moto niyo wawoka pele awo waihi.

19 Wasanaga hili dya zahabu dyandaga enga ndama,

niyo wadivika.

20 Wauhitulaga ukulu wa Mnungu

kwe dihili dya kala dikudya mani.

21 Wamjala Mnungu uyo awayokolaga,

kwa udahi mkulu uko Misili,

22 vihungi vikulu uko Misili,

mbuli za kwitusa uko kwe bahali ya Shamu.

Aho Mnungu eze agambe naawakome want'hu wakwe.

23 Musa mndima ywakwe amsagule akimalaga na kumhiga Mnungu,

na kuikindila maya ya Zumbe ase kuwakoma pele.

24 Niyo waibela idya isi iyedi,

ni kwaviya hawahuwilaga kiya alagane Mnungu.

25 Wandaga na nk'halalizi mwa mahema,

hawamtegelezaga Zumbe Mnungu.

26 Ivo enulaga mkono wakwe kulanga niyo akelisa,

kugamba naawakome pele uwo mwe dijangwa,

27 na kuwatenda welekwa wawe wasambale mwa want'hu wa isi nt'huhu,

na kuwaleka wabanikile mwe isi za want'hu watuhu.

28 Want'hu wa Mnungu wakelungaga mwe kumvika Baali uko Peoli,

niyo wadya nt'hambiko zalavilwagwa milungu heiina ugima.

29 Wayakwezaga maya ya Zumbe Mnungu kwa mbuli zawe ziihile,

niyo wenukilwa ni maine yaihile.

30 Mna Finehasi akimalaga niyo alava usengelo,

maine ayo niyo yahalawa.

31 Ino yamtendaga yehe kunda muwagilwa,

kwa vyeleko vose mazuwa yose.

32 Want'hu wamtendaga Zumbe Mnungu ande na maya uko kwe vizuto va Meliba,

niyo Musa apata makunt'ho kwajili yawe,

33 kwaviya wasagukaga kwa Mnungu,

vamtendaga Musa alonge aheina kufanyanya.

34 Izilaeli hawawakomaga want'hu we zi isi nt'huhu,

enga ivo Zumbe Mnungu awagambaga watende,

35 mna woho wakehanganyaga nawo,

watimilaga vihendo vawe.

36 Wavikaga mahili yawe,

uwo lwinika wa kuwakoma pele.

37 Wawalavaga wana wawe wakilume na wana kike,

kunda nt'hambiko kwe mahili ya Kanaani.

38 Wawakomaga wana hawandaga na masa,

isi niyo yalemelwa kwajili ye sakame ya wana wawe.

39 waketendaga wenye walemelwe kwajili yo udamanyi wawe,

na kunda hi wahuwilwa kwa Mnungu enga wahabwasi.

40 Ivo Zumbe awaihiyaga want'hu wakwe,

na kuuihiya ukipe wakwe.

41 Awenk'hizaga kwo udahi wa want'hu wa isi nt'huhu,

niyo wekailwa ni wank'hondo wawe.

42 Wank'hondo wawe wawatendelaga ukwank'hwalu,

niyo wawaika hasi yo udahi wawe.

43 Kwa luholuho, Mnungu awoyokolaga want'hu wakwe,

mna woho wasagulaga kusaguka,

niyo wagiila mwo kutenda wavu.

44 Hata ivo awategelezaga aho wamwiilaga,

niyo awambiza mwa makunt'ho yawe.

45 Aikumbukilaga indagano kwajili yawe,

naho kwajili yo lukunde lwakwe, awonelaga mbazi.

46 Awatendaga wose wawakunt'hizaga,

wawaonele mbazi.

47 Kionele mbazi Zumbe Mnungu ywetu,

kivuze kulawa kwe zi isi nt'huhu,

vileke kikefenyele nt'hunyo ye dizina dyako dikukile,

na kwanga na kukutogola.

48 Mtunyeni Zumbe Mnungu ywa Izilaeli,

mtogoleni ivi haluse na mazuwa yose,

Kila yumwenga agambe,"Taile!"

Mtogoleni Zumbe.