1 Zumbe kunda ywedi kwa want'hu wako wa mwe isi

kuwatenda want'hu wako wa Izilaeli kunda wapati.

2 Kuusa wavu wa want'hu wako

weye kuyagubikiza maihi yawe wadamanye.

3 Kuyaika hale maya yako mwa suwe,

kuvuza kunyuma luhahila lwa maya yako.

4 Ukivuze weye Mnungu myokozi ywetu,

ukimalise maya yako mwa suwe.

5 Togola noukionele maya mazuwa yose?

Nougendeleze maya yako kwe vyeleko vose?

6 Weye kukinula na kukink'ha ugima naho,

vileke want'hu wako waone kinyemi kwako?

7 We Zumbe, kilagise lukunde lwako ho lukusila,

ukink'he no uyokozi wako.

8 Nenimwive kiya akulonga Zumbe,

alagana utondowazi kwa suwe want'hu wakwe,

uneva hakina uiye kwe zimbuli zetu ze kihezi.

9 Ikindedi, uyokozi uhagihi na wose wakumwogoha,

vileke ung'azi wakwe wikale mwe isi yetu.

10 Lukunde holukusila hamwenga na uhuwilwa vekala hamwenga,

uwagilwa hamwenga na utondowazi vahamp'hikana.

11 Uhuwilwa wasukila kulawa mwe isi

uwagilwa wakaula hasi kulawa kwe mbingu.

12 Heiye, Zumbe naakink'he uwedi,

isi nayo neinde na ulozo.

13 Wawagilwa nawamlongoele,

na kumwiikila lumwe sila yakwe.