Zabuli 64

Kulombeza wamizi

1 We Mnungu, nitegeleze kulombeza kwangu,

wamile ugima wangu kwa wank’hondo wakutisa.

2 Unamile ne mizungu ya waihi,

na kulawa mwe vifyo va waihile.

3 Wanola zinyimi zawe enga sime,

wafyusa milosi yawe ikutwa enga misale ya usungu.

4 Wakalawa kwo ufiso, wawalasa want’hu heweina masa,

wasunguza kuwajunga haheina kogoha.

5 Walangilizana mwe mizungu yawe iihile,

watalaula mwe kwinika mitego kwa kinyele,

wakagamba, "Hahali akudaha kukiona."

6 Waika mizungu ya wiihi wakagamba,

"Kidamanya mzungu ukint’hile"

Ikindedi mizungu ya kinyele ikefisa mwo moyo wa mnt’hu.

7 Mna Mnungu naawalase ne misale yakwe

naho nawalumizwe kwa kwitukiza.

8 Naawakome pele kwajili ye zimbuli zawe,

naho wose wakuwaona nawasingise mitwi yawe kwa kuwabela,

9 naho want’hu wose nawogohe,

nawabwelekeze kiya adamanye Mnungu,

na kufanyanya udamanyi wakwe.

10 Wawagilwa wose nawaone kinyemi mwa Zumbe,

na kunyilikila kwakwe

want’hu wose wedi nawamtunye yehe.