1 Mtogoleni Zumbe bilikizeni ukulu wakwe,

wagambileni want'hu wa isi kiya adamanye.

2 Kemeni nt'hunyo kwa Zumbe,

simuileni va kwehela viya adamanye.

3 Kefenyeleni dizina dyakwe dikukile,

miyoyo ya wose wakumzungula, neinde na kinyemi.

4 Mzunguleni Zumbe na udahi wakwe,

zunguleni undiilo wakwe mazuwa yose.

5 Kumbukileni mbuli za kweheela adamanyaga Mnungu,

vihungi vakwe na usengelo alongile,

6 nyuwe welekwa wa Ibulahimu mndima wakwe,

nyuwe welekwa wa Yakobo mndima ywakwe amsagule.

7 Yehe niye Zumbe Mnungu ywetu

usengelo wakwe umwe si yose.

8 Naakumbukile Indagano yakwe mazuwa yose,

kiya alagane ni kwa vyeleko alufu.

9 Indagano aikile na Ibulahamu,

ikilapi akekilisile kwa Isaka.

10 Zumbe Mnungu kaika ndagano na Yakobo inde sigilizi,

na Izilaeli inde ndagano ya mazuwa yose,

11 agambaga, "Nohwink'he isi ya Kanaani,

inde ukipe wenyu mwenye."

12 Want'hu wa Mnungu wandaga wageke,

watakwiza mwe isi ya Kanaani,

13 wangadikaga isi na isi,

seuta kwiita kwa seuta mtuhu.

14 Hamlekele yeyose awahujile,

hata maseuta awakanyaga kwajili yawe,

15 Akawagamba, "Msekuwakwafa wandima wangu niwasagule,

mse kuwatendela maihi walotezi wangu."

16 Zumbe aletaga gumbo mwe isi yawe,

niyo abananga nk'hande yose waihuwilaga.

17 Awalongolezelaga mnt'hu kulongole kwawe,

uyo Yusufu atagwagwa uko kwo utumwa,

18 viga vakwe vanyinywagwa mp'hingu,

ne minyololo ya kilama mwe singo yakwe,

19 mpaka aho ulosi wakwe wize unde kindedi,

kulagana kwa Zumbe kwize kukint'he kugamba kindedi yehe ni muwagilwa.

20 Seuta ywa Misili awagambaga want'hu wamlohole,

mkulu ywa want'hu amlekelaga.

21 Amwiikaga kunda mkimalizi mwe nyumba yakwe,

na mta udahi mwe ugoli wose wa seuta.

22 Awalangilizaga vilongozi wose enga ivo aungile yehe,

na kuwahiniza mizungu wadala wakwe.

23 Izilaeli engilaga Misili,

Yakobo andaga mtakwiza mwe isi ya Hamu.

24 Zumbe awagenyezaga want'hu wakwe,

awatendaga wandilise na ludole kujink'ha wank'hondo wawe.

25 Awatendaga Wamisili wawaihiye want'hu wakwe,

wawatendelaga ukwank'walu wandima wakwe.

26 Amtumaga mndima ywakwe Musa,

hamwenga na Haluni uyo amsagulaga.

27 Wadamanyaga kilagiso na vihungi va mwe isi ya Misili,

va kweheela mwe isi ya Hamu.

28 Mnungu agubikaga lwiza mwe isi,

mna Wamisili wagendelaga kusaguka.

29 Ayatendaga mazi yawe kunda sakame,

niyo akoma zisamaki zawe zose.

30 Majula yamemeaga mwe isi yawe,

nyumba ya seuta nayo yamemaga aayo du.

31 Zumbe Mnungu asigiilaga niyo yeza matuluma ya sofulo,

maboi niyo yamema mwe isi yose,

32 fula yawe aitendaga inye ya maiwe,

lumwemwe na nk'huwa mwe isi yawe yose.

33 aibanangaga mizabibu na mitini yawe

avunaga maziti yose ye isi yawe.

34 Asigiilaga niyo sige zeza,

na ngeda heziikuwazika.

35 Zadyaga maziti yose yekwani mwe isi yawe,

zalubutulaga kila kihandwa chawe mwe isi.

36 Awakomaga nt'hula sasu wose mwe isi,

matunda ya nk'hongo yo ubwanga wawe.

37 Zumbe awalavaga want'hu wakwe Izilaeli uko Misili,

wakanda waguha masawa na zahabu,

hakwandaga na yeyose akobadikaga.

38 Wamisili waonaga kinyemi weze wahalawe,

kwaviya wawogohaga Waizilaeli.

39 Mnungu awagubikaga want'hu wakwe ne divunde,

no moto wawazangazilaga umwo kwandaga nekilo.

40 Walombezaga niyo awegaila nk'wale,

awegusaga kwa nk'hande ya kwe mbingu.

41 Alutulaga uluwe niyo kwatumbuka mazi,

yaseelaga mwe dijangwa enga mto.

42 Kwaviya akumbukilaga kulagana kwakwe kukukile,

aiikaga kwa Ibulahimu mndima wakwe.

43 Wat'hu wakwe awalavaga Misili kwa kinyemi,

wadya awasagule wakemaga na kwanga.

44 Awenk'haga isi ya want'hu ya watuhu

niyo waguha viya vidamanywe ni watuhu,

45 vileke watimile imiko yakwe,

naho watende viligane ne zisigilizi zakwe.