1 Zumbe Mnungu niye seuta, si neione kinyemi,

visiwa vingi vange kwa kinyemi.

2 Mavunde na ziza tilili dimzunguluka,

uwagilwa ne kindedi nizo zink'hongelo ze difumbi dyakwe dye kiseuta.

3 Moto umlongoela,

niyo wawoka wank'hondo nt'hendelo zose.

4 Lumwemwe lwakwe lwaing'aza si,

want'hu wa mwe isi zose waluona na kuzingiza.

5 Milima yalungulumka ho undiilo wakwe enga nt'ha,

aho naande Zumbe Mnungu ywe si yose.

6 Zimbingu zabilikiza ukindedi wakwe,

naho want'hu wose wauona ukulu wakwe.

7 Wakuvika mahili wose nawageligwe soni,

naho wakuketogoela milungu misokezi, milungu yose yakefunamiza hakwe.

8 We Zumbe Mnungu want'hu wa Sayuni wana kinyemi,

want'hu wa Yuda wanga,

wanga kwajili yo usengelo wako.

9 Kwaviya weye Zumbe Mnungu ywi mkulu kujink'ha wose mwe si,

naho kutunyiswa mwe milungu yose.

10 Zumbe Mnungu awaungisa wakwiihiya wiihi,

amila ugima wa want'hu wakwe wahuwilwa,

naho awayokola kulawa mwo udahi wa want'hu waihile.

11 Ung'azi wawazangazila want'hu wahuwilwa,

kinyemi ni kwa wata miyoyo yedi.

12 Wawagilwa wose mmuonele kinyemi Zumbe Mnungu,

naho ditunyeni dizina dyakwe dikukile.