1 Zumbe Mnungu, usekunikanya kwa maya yako,

naho usekuni sengela kwa maya yako yatendese.

2 Misale yako initunga,

mkono wako unibwiila.

3 Hahana hant'hu hedi mwo mwili wangu

kwaviya kuniihiya,

hahana hant'hu hana uwedi mwa mavuha yangu,

kwajili yo wavu wangu.

4 Higubikwa vitendese nu wavu wangu,

naho wanizamila enga, nt'hwika izamile kwangu.

5 Nk'hwenge zangu ziola na kununk'ha

ayo nayo ni kwaajili yo uhezi wangu.

6 Hifunama mpaka hasi na kuvunika,

msi wose nazungulukaga hahongeza.

7 Mgongo wangu uhambigwa ni maine,

mwo mwili wangu wose hamna wedi wowose.

8 Hitigint'hika na kuhondeka,

nasulumila mwo moyo wangu.

9 Zumbe ywangu weye kumanya kawiilo dyangu dyose,

kwako hakihali kikukefisa.

10 Moyo wangu wagulukisa, ludole lwangu lusila pele.

Hata meso yangu nayo yakonga kwaza kuona.

11 Wambwiyazangu na weyangu wanyilika kuyaona makunt'ho yangu,

wandugu zangu nawo wekala hale na miye.

12 Wakuunga wanikome wanitegela mitego yawe,

wakuunga nilumile wanitisa kunikoma,

msi wose waika mzungu iihile mwa miye.

13 Mna miye hinda hikwiva,

naho hikudaha kulonga kint'hu.

14 Heiye hinda mnt'hu hekwiva,

enga mnt'hu heena chochose cha kukegombela.

15 Mna nakuhuwila weye Zumbe Mnungu,

weye Zumbe Mnungu ywangu ni weye nounihitule.

16 Nakulombeza du kugamba, wank'hondo wanase kunda na kinyemi,

wakangila kuhumwa kwangu.

17 Nihagihi na kuhumwa,

nagojelwa na masulumizo ya mazuwa yose.

18 Nalombeza unilekele uwihi wangu,

wavu wangu wanink'ha kinyulu.

19 Wank'hondo wangu wabinda wingi,

wadya wakuniihiya haheina lema hawakuwazika.

20 Awo wakuniliha yaihile kwa yadya ayedi niwadamanyile,

wanihiga kwaviya nadamanya ayedi.

21 Unase kuniduula Zumbe Mnungu ywangu,

Zumbe Mnungu unase kwikala hale na miye.

22 Usunguze kunizila unambize,

Zumbe Mnungu ywo uyokozi wangu.