1 Weye Zumbe Mnungu kunda ukalo wetu kwa vyeleko vose.

2 Hata aho milima yandaga ikei kuumbigwa,

hegu aho si yose yandaga ikei kuumbwa,

weye wandaga ywa mazuwa yose,

naho ni weye Mnungu hwiina uheelo.

3 Weye wawavuza want'hu mwe sanga,

ukakigamba, "Nyuwe want'hu, uyeni umwo mwalawaga."

4 Kwako weye miyaka alufu

ni enga zuwa dimwenga,

ni enga zuwa dya gulo dyomboke kale,

ni enga luzo lumwenga lwa kilo kimwenga.

5 Wawakubila want'hu mwe isi wanda enga nt'hongo.

Want'hu wanda enga mani mahya,

enga sukwe ya nomtondo,

6 yasuka kwa uhya aho mtondo,

mna ikabula kisingi yanyuluka na kunyala.

7 Maya yako yakiusa pele mwe isi,

naho luhahila lwako lukiika mwo wagofi.

8 Maihi yetu kuyaika aho wili,

wavu wetu wa kwe kinyele wi ho unga'zi wo undiilo wako.

9 Kwaviya mazua yetu yose yombokela mwo luhahila lwako.

miyaka yetu yasunguza kusila enga muye.

10 Mazuwa yo wikazi wetu ni milongo mfungate,

uneva nekinde na ludole neibule milongo mnane,

mna hamwenga na ayo kimwa makunt'ho na masulumizo du,

naho vasunguza kusila niyo chagiila tolwa.

11 Niani amanyize udahi wa maya yako?

kwa viya luhahila lwako lukulisa viwagilwe suwe kukogoha.

12 Elo kihinize suwe kimanye kuwaza mazuwa yetu,

vileke kinde na moyo wa mizungu.

13 Maya yako nayasile ini?

Unde na mbazi kwa wandima wako weye Zumbe Mnungu.

14 Ukiguse kwa lukunde lwako kila mtondo,

naswe nekikeme na kwanga mwo wikazi wetu wose.

15 Kink'he kinyemi viligane na mazuwa wakisulumizaga,

enga ivo lupisi lwa makunt'ho chayaonaga.

16 Wandima wako wauwone udamanyi wako mkulu,

welekwa wako nawo wauone ung'azi wako utendese.

17 Uwedi wa Zumbe Mnungu ywetu unde mwetu,

ukink'he upati mwe zindima kikudamanya.