1 Nagulukila utondowazi kwa Zumbe Mnungu.

Mwadaha vivihi kunigamba,

"Puluka enga dege mwe milima,

2 kwaviya waihile wavuta uta,

waigela chalumwe imisale vileke walase,

wawalase misale mwo lwiza want'hu heweina lema.

3 Uneva nk'hongelo inabanangwa,

mnt'hu ywedi naadamanyei."

4 Zumbe Mnungu emwe nyumba yakwe ikukile,

difumbi dyo ukulu dya Zumbe Mnungu di kwe mbingu,

kwa meso yakwe akaula want'hu,

naho amanya icho wakudamanya.

5 Zumbe Mnungu awahima want'hu wedi na want'hu waihile,

naho awaihiya wata wavu na wank'humbizi.

6 Neiwanyeele fula ye nk'hala zo moto na madini ya chola want'hu waihile,

mp'heho ya nk'hungunt'ho neinde usengelo wawe.

7 Zumbe Mnungu ni ywedi naho aungisa uwedi,

want'hu wedi nawekale naye.