1 Kwako weye Zumbe Mungu naika dikawiilo dyangu,

2 nakuhuwila weye Zumbe Mnungu ywangu,

usekunileka nengila niyo nengila soni,

hegu wank'hondo wangu waonele kinyemi kuhumwa kwangu.

3 Wose wakukuhuwila hawahumwe,

mna wose wakukuhiga nawo nawengile soni.

4 Zumbe Mungu nihinize zisila zako,

vileke miye nidamnye yakukwelela.

5 Nihinize viligane ne kindedi chako,

kwaviya ni weye Mnungu ukuniyokola,

naho mazua yose nakukawiila weye.

6 Ukumbukile weye Zumbe Mnungu mbazi zako na lukunde lwako,

kwaviya zandaga uuko kukongela aho kale.

7 Usekukumbukila wavu na malema yo ubwanga wangu,

no wavu wangu wo ukwank'walu

unikumbukile kwajili yo lukunde lwako,

kwaviya weye Zumbe Mnungu uywedi.

8 Kwaviya Zumbe Mnungu ni ywedi na muwagilwa,

awahiniza wata wavu zisila zo kutimila.

9 Awalongoza wakweseleza kudamanya yakuwagila,

naho wajalamu naawahinize zisila zakwe.

10 Sila zose za Zumbe Mnungu ni za lukunde no uhuwilwa,

naho ni kwa wose wakutimila indagano yakwe, na yadya yakumwelela.

11 Na kwajili ye dizina dyako weye Zumbe Mnungu niusile wavu wangu,

kwaviya utendesa.

12 Wose wana wogofi kwa Zumbe Mnungu,

yehe naawahinize zisila zo kutimila.

13 Mazua yose nawande wapati,

welekwa wawe nawo, isi neinde yawe.

14 Zumbe Mnungu awalongoza wadya wakumwiva,

yehe awagambila yakuungwa mwe indagano yakwe.

15 Miye namkaula Zumbe Mnungu mazua yose anambize,

kwaviya naaniyokole ne mitego.

16 Unikaule na kunionelea mbazi weye Zumbe Mnungu,

kwaviya miye nikedu naho nakunt'ha.

17 Uuse sungusungu dyo moyo wangu,

naho uniyokole mwa makunt'ho yangu yose.

18 Fanyanya disungusungu na kiyangayanga cho moyo wangu,

uniusile wavu wangu wose.

19 Kaula wank'hondo wangu ivo wabindile wingi,

sinya ivo wakuniihiya kwa luhahila.

20 Uniyokole naho unamile,

usekunileka hengila soni,

kwaviya nanyilikila kwako.

21 Uwedi na uhuwilwa vinamile,

kwaviya kawiilo dyangu dikwako.

22 Wayokole want'hu wako Waizilaeli,

walawe mwa makunt'ho.