1 Weye Mnungu nii kukileka mazuwa yose?

Nii maya yako yalawa mosi mwe zingoto za madimilo yako?

2 Wakumbukile want'hu wako wawasagulaga uko kale,

want'hu awo awakombole wande wako mwenye,

ukumbukile mnima Sayuni aho ukwikala.

3 Gendeela umu mnanga mwa mank'hala nk'hala aya ya mazuwa yose,

wank'hondo wabananga kila kint'hu mwe Nyumba yako.

4 Wank'hondo wako wabuma mwe Nyumba yako ikukile,

waika ne bendela yawe inde kiwalo cha uhumi.

5 Wanda enga want'hu wenule hoya

vileke wayakant'he maziti.

6 Watulagatulaga zinyivi zose ze kiunt'handa,

kwa mahoya na vigomandilo vawe.

7 Wahokaga moto hakukile hako,

na kuhagela usavu aho want'hu wakukuvika.

8 Waungisaga kukibinda pele,

wokaga moto kila hant'hu mwe isi aho nekikakuvika weye.

9 Hakikuviona naho vilagiso vikukile,

hawahali walotezi wasigale,

naho hahali yeyose amanyize kugamba mbuli izi nezisile ini.

10 Wank'hondo wetu nawaleke kukubela weye Mnungu?

Nawadihomole dizina dyako mazuwa yose?

11 Nii wauvuza mkono wako?

Heiye, mkono wako wo kulume,

ulave mwe kifuwa chako,

ukawakome pele

12 Mna Mnungu niye Seuta ywetu kukongela aho nk'hongo,

egala uyokozi mwe isi.

13 Ni weye waipangile ibahali kwa udahi wako mkulu,

waitulaga imitwi ya makala makulu ya kutisa mwa mazi,

14 waitulaga mitwi ya Leviatani

niyo ikimba chakwe wayenk'ha makala ya kwe nyika yapate nk'hande.

15 Ni weye watumbulaga nc'hoko ne vizuto,

naho ni weye wanyazaga mito yandaga akaseela haheina kuleka.

16 Msi, wako, kilo nacho chako.

naho ni weye waikaga dizua no mnenge.

17 Ni weye waikaga mihaka yose ya si,

niyo waika misimo ya masika ne kiangazi.

18 Mnungu, hake kumbukila ivo wank'hondo wakukubela,

ivo want'hu wahezi wahomolaga dizina dyako.

19 Use kwink'hiza ugima we zisuwa zako kwa makala yaihile,

use kuujala wikazi wa want'hu wako wakusulumila.

20 Ikumbukile indagano yako,

kwaviya hant'hu hana lwiza mwe isi,

kumema ukalo wa ukwank'walu.

21 Usekuleka wakutendelwa ukwank'walu wageligwe soni,

wakiwa na heweina kint'hu uwenk'he kuditogola dizina dyako.

22 Winuke weye Mnungu, ukegombele,

ukumbukile ivo wahezi wakukutendela lubezo msi wose.

23 Use kujala izwi dya wank'hondo wako,

na nk'humbizi heziikusila za wahigani wako.