1 We Mnungu usekunyamala,

usekuhumula, usekwikala kinyamaile.

2 Wank'hondo wako wegala nk'humbizi,

hewekukuunga wenula mitwi yawe.

3 Waika mizungu kinyele wawalumize want'hu wako,

wafanyanya kuwakoma want'hu wako ukuwaungisa.

4 Wakagamba,"Soni kiwabanange pele Waizilaeli awa,

vileke wasekukumbukilwa naho."

5 Heiye, waika mzungu kwa hamwenga,

waika kilapi wakuhige weye.

6 Want'hu wa Edomu na Waishumaeli,

want'hu wa Moabu na Wahagali,

7 want'hu wa Gebali, want'hu na wa Amoni, na Waamaleki,

Wafilisiti na Watilo.

8 Waashulu, nawo waivana,

wawambize welekwa wa Lutu.

9 Watendele enga ivo wawatendile Wamidiani,

naho enga kwa Sisela na Yabini kudya kwo mto wa Kishoni.

10 Wadya wawakomaga pele kudya Edoli,

niyo vimba vawe vanda enga nt'hagata mwe sanga.

11 Watende vilongozi wawe enga ivo uwatendile Olebu na Zeebu,

watende wakulu wawe enga ivo uwatendile Zeba na Zalimuna.

12 Awo nawo wagambile, "Kiitahe isi ina madimilo,

wakeguhile isi ya Mnungu inde yawe."

13 We Mnungu, wamwaganise awo enga nt'hifu ya sanga,

naho wande enga mabuwa yakupuputiswa ni mp'heho ya kasungula.

14 Enga ivo moto ukoka mbago,

naho enga ndilija za moto zikoka nyasi za milima,

15 elo, wakulumbuze na mjubwaniso mkulu,

na kuwagela lukeng'ent'ha kwa heho dya nk'hung'unt'ho.

16 Wagele soni mwe vihanga vawe,

vileke wauzungule udahi wako.

17 Nawageligwe soni na kinyulu mazuwa yose,

wasile pele haheina kuonelwa mbazi.

18 Wamanye kugamba ni weye Zumbe,

weye niwe wi kulanga vitendese kujink'ha wose.