1 Wiihi walonga na mnt'hu aihile,

wandilisa mwo moyo wakwe,

mbuli ya kumvika Zumbe Mnungu haimuli mwakwe.

2 Mwiihi akeduvya yehe mwenye

akafanyanya kugamba wiihi wakwe houmanyike na kuligitwa.

3 Icho naalonge ni lulimi naho ni uwiihi du.

Kaleka kutimila umanyi na kudamanya ayedi.

4 Umwo akagona afanyanya yaihile

naho atimila mbuli ziihile,

hegu hakulekana no wiihi.

5 Weye Zumbe Mnungu lukunde lwako lugenyela hata kwe mbingu,

uhuwilwa wako ubula kwa mavunde.

6 Uwagilwa wako ni enga mnima mkulu,

usengelo wako ni enga mina ye bahali,

weye Zumbe Mnungu wawamila want'hu na viumbwa vituhu.

7 Lukunde lwako holukusila ni lwedi vitendese,

want'hu wagulukila kwe kizuli cha mawawa yako.

8 Wawegusa kwa ugoli we nyumba yako,

wanywa mazi kulawa mwo mto wo uwedi wako.

9 Weye ni weye chotoko cho ugima,

kwa ung'azi wako chauwona un'gazi.

10 Ugendeele kulagisa lukunde wadya wose wakukuvika,

utendese kunda ywedi kwa wadya awedi.

11 Usekuzumila wata weduvi wanikump'hukile,

hegu want'hu waihi waniguluse.

12 Awo wakudamanya yaihile wagwa,

wagwelesa hasi hehali akudaha kuwenula.