Kulombeza wamizi 1 Mnungu, Unamile,

kwaviya kwako nagulukila utondowazi.

2 Namgamba Mnungu,

"Weye ywi Zumbe ywangu, kila kint'hu chedi nnanacho chalawa kwako."

3 Watendesa uwedi wakukile wa mwe isi,

nelelwa kwikala nawo.

4 Mna wakuvika milungu mituhu,

nawapate makunt'ho makulu,

nt'hambiko ya sakame heniilave naho,

na mazina ye milungu yawe heniyatambule.

5 Weye Zumbe Mnungu ni weye ukunink'ha vint'hu vose,

upati wangu umwako.

6 Kunihimila hant'hu hedi,

kindedi ukipe wangu ni wedi vitendese.

7 Namtunya Zumbe Mnungu kwa kunilongoza,

hata nekilo moyo wangu wanihinza cho kudamanya.

8 Zumbe anilongowela mazuwa yose,

ehamwenga na miye hakihali cha kunisingisa.

9 Kwa ivo neninde na kinyemi na kwanga mwo moyo wangu,

name nenikale kwa utondowazi,

10 kwaviya nounamile no ludole lwe file,

hounileke mhuwilwa ywako nibanike.

11 Wanilagisa sila ya mpaka kwo ugima,

kwa weye kunda na miye kwanitenda ninde na kinyemi,

naho nenange mazuwa yose.