1 Yeyose naande mwo wamizi wa Mnungu ekulanga,

akuunga ekale mwo udimi wo mta udahi,

2 nenimgambile Zumbe,

"Ni weye unyilikilo na gomela dyangu,

niwe Mnungu ywangu, weye dikawiilo dyangu."

3 Naakuyokole ne mitego winikilwe,

na kukulava mwe maine yakukoma.

4 Naakugubike na mazoya yakwe na mawawa yakwe,

houbwiilwe ni maihi ukanda mwo udimi wakwe,

uhuwilwa wakwe noukwamile na kukudima.

5 Howogohe wogofi wa kilo,

hegu misale ikulasa nomsi,

6 enga mavuma yakwiza mwo lwiza,

maihi yakukoma nomsi.

7 Hata uneva want'hu alufu wanagweela hagihi na weye

naho watuhu alufu mlongo wagweele kulume kwako,

weye houlumizwe.

8 Weye noukaule,

niyo waona ivo wakusulumizwa want'hu hiwawagilwa.

9 Kwaviya Mnungu kanda unyilikilo wako,

kumtenda uyo ekulanga kunda hant'hu hako ha kwikala,

10 hayakuli makunt'ho nayakwiziile,

hegu nk'huswank'huswa mwe kaya yako.

11 Kwaviya naawagambe watumigwa wakwe wa kwe mbingu,

nawakudime mwe zisila zako zose.

12 nawakwinule mwe mikono yawe,

unase kukobadisa ikiga chako mwe iwe.

13 Noujate simba na mazoka,

simba zina maya na mazoka yana usungu.

14 Neniwayokole wadya wakuniunga,

neni wamile kwaviya wamanya kugamba ni miye Zumbe.

15 Umwo wakanitanga neniwetike,

neninde nawo umwo wakadugana na makunt'ho.

Neniwayokole na kuwatunya.

16 Neniwenk'he kwikalisa mwe isi na kuwenk'ha va kwigusa,

naho neniwayokole.