1 We Mnungu nionele mbazi, nionele mbazi

kwaviya miye nanyilikila kwako nihone nk'hondo

miye nakenyilisila mwo ugubiko wa mawawa yako,

mpaka aho mjubwaniso wo ukomi nousiile.

2 Namlombeza Mnungu ywa kulanga vitendese,

ni Mnungu akunikint'hizila yadya huyaunga.

3 Naanink'he uhituzi kulawa kwe mbingu na kuniyokola,

naawagele soni awo wakunisunk'hasunk'ha.

Mnungu naanilagise lukunde lwakwe holuukusila hamwenga no uhuilwa wakwe.

4 Hizungulukwa ni wank'hondo,

wakwinga simba zina sala ya nyama za want'hu,

ngeso zawe enga mijungo naho enga misale,

zinyimi zawe nazo enga sime ikutwelesa.

5 Weye Mnungu, ukulu ni wako uko kwe mbingu,

naho ung'azi wako utendese wenele mwe isi zose.

6 Waniikila lwavu vileke wanigwile,

moyo wangu wingila kinyulu,

wanisimbila bome vileke nihubugile,

mna wahubugila wenye.

7 Mnungu, miye moyo wangu utoga,

nenikeme na kukutunya weye!

8 Winuke weye moyo wangu,

winuke weye zeze dyangu ne kinubi,

naho neni dinule ditont'homoko.

9 Weye Zumbe, miye nohwink'he nt'hogola mwe si zose

naho nohutunye mwa want'hu.

10 Kwaviya lukunde lwako holukusila, ni enga ivo zili zimbingu,

uhuilwa wako nawo ni enga kulanga kwo ulanga.

11 Weye Mnungu wink'we ukulu kwe mbingu,

ung'azi wako utendese nawo wenele mwe ziisi zose.