1 Namwiila Mnungu kwa izwi,

namwiila kwa izwi vileke anive.

2 Habwiilana na makunt'ho namlombeza Zumbe Mnungu,

nacheleza hachulula mikono yangu,

mna moyo wangu ulemela kusangalzwa.

3 We Mnungu, nehikukumbukila weye,

umwo hafanyanya mpaka nengila chevu.

4 Kunitenda ninde meso kilo chose,

nna kiyangayanga naho hikudaha kulonga.

5 Nafanyanya mazuwa ya kale,

nakumbukila myaka yomboke.

6 Nekilo nakumbukilaga wila nakemaga,

naho nakeuza mwo moyo wangu,

7 "Ivi Zumbe Mnungu haakizumile naho?

Hakitendele uwedi wakwe naho?

8 Lukunde lwakwe holwiina uheelo luhalawa mazuwa yose?

Ivi haakint'hize naho kiya alagane?

9 Haluse nivo Mnungu kajala kunda na mbazi?

amaya yakwe yaguha hant'hu he zimbazi zakwe?"

10 Niyo nakegamba, "Iki nicho kikunilumiza mwo moyo,

Mnungu mkulu kahituka hakukidamanyila kint'hu naho."

11 Nenikumbukile makulu ayo udamanye weye Zumbe Mnungu,

henijale vihungi ivo wadamanyaga.

12 Nenifanyanye zindima zako zose,

na kutalaula udamanyi wako mkulu.

13 Sila yako weye Mnungu ikuka,

ni yuhi Mnungu mkulu enga weye Mnungu ywetu?

14 Ni weye Mnungu ukudamanya vihungi,

kulagisa ukulu wako mwe si.

15 Kwa udahi wako kuwayokola want'hu wako,

welekwa wa Yakobo na wa Yusufu.

16 Mazi yeze yakuone weye Mnungu yogohaga,

mazi matali ye bahali yazingizaga.

17 Mavunde yetilaga vula kulu,

lukuwa lwevikaga mwo ulanga,

misale yako yenelaga nt'hendelo zose.

18 Mtint'hilo wako nowivika mwe mp'heho ikuzunguluka,

lumwemwe lwako niyo lwa mweka isi yose,

si yazingizaga na kusingisika.

19 Weye wagendaga mwe bahali,

lwombokelo lwako mwa mazi matali,

hamwenga na kugamba zinyayo zako hazioneke.

20 Wawalongozaga want'hu wako enga mdimi akulongoza ngoto zakwe,

kwa ulongozi wa Musa na Haluni.