1 Zumbe Mnungu niye mkulu awagilwe kutogoleswa,

mwo mzi wa Mnungu ywetu, mnima wakwe ukuka.

2 Mnima Sayuni uhombweela mwo utali wakwe kuita kulanga,

chotoko cha kinyemi mwe si yose,

waligana na mnima Zafoni,

ni mzi mkulu wa seuta mkulu.

3 Mnungu niye gomela dyakwe,

yehe kakelaviliza mwenye kunda mwamizi ywakwe.

4 Maseuta waduganya hamwenga watowani wawe,

niyo waita hamwenga wakautowe mzi wa Sayuni.

5 Mna weheelwagwa weze waone ivo,

wogohesaga niyo wanyilika.

6 Wengilwagwa ni kizingizo,

na usungu enga mvele ehagihi na kwingila nyumba,

7 wawakomaga enga meli zitogile za Talishishi,

zabogozolwagwa ni nk'hung'unt'ho ya ulailo wa zuwa.

8 Ayo kivile

nayo kione,

mwo mzi wa Mnungu ywetu, mta udahi wose,

uwo naaudime mazuwa yose.

9 Mwe nyumba yako weye Mnungu,

chafanyanya lukunde lwako holwiina uheelo.

10 Weye Zumbe enga ivo zina dyako dikutunywa kila hant'hu,

naho walongoza kwa uwagilwa,

kwa mkono wako kudamanya yakuwagila.

11 Want'hu wa Sayuni nawande na kinyemi,

wakwikala mwo mizi ya Yuda nawange,

kwajili yo usengelo wako wo uwagilwa.

12 Iteni mkauzunguluke mzi na kuwaza vigela vakwe.

13 Kauleni zink'handula zakwe na magomela yakwe,

vileke mwize muwasimulizile welekwa wakwiza.

14 "Uyu Mnungu ni ywa mazuwa yose

naakilongoze lupisi lwose lukwiza."