1 Utogolwe weye Mnungu ywa Sayuni,

naho want'hu nawakint'hize kiya wakulagane.

2 Ni weye ukutegeleza kiya want'hu wakulombeza,

want'hu wose naweze kwako.

3 Kikazamilwa ni malema yetu wetu,

weye mwenye wakiusila wavu wetu.

4 Wana kinyemi wadya uwasagule

wadya ukuwaleta wekale hakukile hako,

naweguswe ni ayedi ye kaya yako,

na uvikilwa wa mwe Nyumba ya Mnungu ikukile.

5 Kwa kweheelesa weye wakink'ha uhituzi na kukikombola,

weye Mnungu ywo uyokozi wetu,

ni weye dikawiilo dye vint'hu vose mwe si,

na uko hale kwe bahali.

6 Kwa udahi wako nokuiika milima hant'hu hawe,

mwenye ukalagisa ukulu wako.

7 Weye wanyamaza mtindilo we bahali,

no ukwivika kwo mjubwaniso wakwe,

naho wanyamaza nk'humbizi ya want'hu.

8 Si zose zeheelwa,

kwo udamanyi wako mkulu,

yadya ukudamanya yegala kwanga kwa kinyemi,

kulawa nt'hendelo umwenga kuita int'huhu.

9 Weye wailela isi kwa kuigaila fula,

waitenda inde na uwolo,

vizuto vose wavimemeza mazi,

want'hu wakwe wawenk'ha nk'hande.

Ivi nivo ukuidamanya isi.

10 Waitenda fula inyelese mwe migunda ilimigwe,

na kuijabaza na mazi

mikologombe yakwe nayo waijabaza na fula ndodondodo.

na kuihoteza maziti ye hengi.

11 Uvikilwa wako waoneka mwaka mgima,

kila hant'hu hamema uwedi wako.

12 Nyika za mani zimema mifugwa

milima nayo yanga kwa kinyemi.

13 Madimilo yamema ngoto,

makolongo yamema ngano,

kila kimwenga changa na kukema kwa kinyemi.