1 Nakuungisa weye Zumbe Mnungu,

weye ni chotoko cho ludole lwangu.

2 Zumbe Mnungu ni mwamizi ywangu,

gomela dyangu na mkombola ywangu,

Mnungu ywangu na luwe lwangu,

nk'hindilo yangu na ludole lwa uyokozi wangu.

3 Namwitanga Zumbe Mnungu akuwagilwa nt'hunyo anambize,

miye name nayokolwagwa kulawa kwa wank'hondo wangu.

4 kubiilika kwe file kwanizungulukaga,

malao ya wiihi yanigela wogofi.

5 Sigi ze file zanizungulukaga,

lwinika we file nounibwiila.

6 Mwa makunt'ho yangu namwitangaga Zumbe Mnungu,

namwiilaga Mnungu anambize,

evaga izwi dyangu umwo mwe dihema dyakwe,

ndilo yangu yambwiilaga kwe mbingu.

7 Umwo isi ikazingisika na kuzingiza,

nk'hongelo zo mnima zazingizaga,

kwaviya Zumbe Mnungu kandilisa na maya.

8 Mosi wafunk'haga kulawa mwe zimp'hula zakwe,

moto na nk'hala za moto ukoka zalawaga mwo mnomo wakwe.

9 Aifunamizaga ulanga na kuseela hasi,

na vunde titu hasi he viga vakwe.

10 Akwelaga kiumbwa kina mawawa kikupuluka,

na kupulukisa kulanga mwa mavunde.

11 Akegubikaga na ziza nt'hendelo zose

mavunde yazamile yamemile mazi yamzungulukaga.

12 Kwajili yo ung'azi wo undiilo wakwe mavunde matitu yagubikaga,

hamwenga na fula ya maiwe

na lukuwa lwa lumwemwe.

13 Zumbe Mnungu alavaga izwi kulawa kwe mbingu,

izwi dya Mnungu mkulu dyevikaga kose.

14 Awalasaga wank'hondo ne misale yakwe na kuwatenda wasambale,

aduulaga lumwemwe na kuwagulusa.

15 Mwina we bahali wagubukaga

nk'hongelo ye isi yaonekaga

kwajili ye diizwi dye nk'hondo,

kulawa mwe zimp'hula zako.

16 Zumbe Mnungu niyo achulula mkono wakwe kulawa kulanga na kuniguha,

aniinulaga kulawa mwa mazi mengi.

17 Aniyokolaga kulawa mwa wank'hondo wangu wata ludole lutendese,

aniyokolaga kulawa kwa awo nawakaniihiya,

kwaviya nawanda na ludole lwa kunihuma.

18 Nawanikump'hukila handa mwa makunt'ho,

mna Zumbe Mnungu anamilaga.

19 Aniguhaga na kuniika hant'hu ha kutondowala,

aniyokolaga kwaviya aniungisaga.

20 Zumbe Mnungu anink'haga geleko kwa uwedi wangu,

anamilaga kwaviya nehinda hina masa.

21 Kwaviya nehitimila sila ya Zumbe Mnungu,

hegu hisaguke kwa Zumbe Mnungu ywangu kwa uwihi.

22 Hiyatoza malagizo yakwe yose,

hilekile kutimila sigilizi zakwe zose.

23 Hakwe shandile na masa,

hekeamila nisekunda na lema.

24 Zumbe Mnungu anink'haga nt'hunyo kwaviya nandaga ywedi,

yehe kamanya mikono yangu haina masa.

25 Weye ni mhuwilwa kwa wadya wahuwilwa,

houne masa kwa wadya heweena masa.

26 Weye uywedi kwa wadya awedi,

mna umkwakwa kwa waihi.

27 Weye wawayokola wakukeseleza,

mna wata weduvi wawaseleza.

28 Naho weye Zumbe Mnungu wanimulikila,

weye Mnungu ywangu wadihausa diziza dimwangu.

29 Kwa wambizi wako nawahuma wank'hondo,

weye kunink'ha udahi wa kumola magomela yawe.

30 Uyu Mnungu udamanyi wakwe hauna lema dyodyose,

kilapi chakwe Zumbe Mnungu ni cha kindedi,

yehe ni mwamizi kwa wadya wose wakumgulukila.

31 Niani eli Mnungu kujink'ha Zumbe Mnungu?

Niani eli mwamizi kujink'ha Zumbe Mnungu ywetu?

32 Mnungu niye akuniink'ha udahi kila hant'hu,

ni yehe akuidamanya isila kunda itondowale.

33 Kavitenda viga vangu kunda na ludole enga mbala,

na kunitenda nidahe kukimala mnanga mwe milima.

34 Akanihiniza kutowana nk'hondo,

mikono yangu yadaha kulasa ne misale ye shaba.

35 Kunink'ha nk'hindilo yako ya kunamila,

mkono wako wa kulume unambiza,

kukeseleza kwako kunitenda ninde mkulu.

36 Kuitenda sila yangu kunda yedi,

naho viga vangu haviteele.

37 Nawatimilaga wank'hondo wangu niyo nawagwila,

shauyaga kunyuma mpaka niwakome.

38 Nawagwesaga hasi hawadahaga kwinuka naho,

na kugwa hasi ye viga vangu.

39 Weye kunik'ha ludole lwa kutowana nk'hondo,

wawaselezaga hasi yanguhwank'hondo wangu.

40 Kuwatenda wank'hondo wangu wanyilike,

na wadya nawakaniihiya nawakomaga.

41 Wagutaga lukunga mna hakwandile na yeyose ywa kuwaambiza,

wamwilaga Zumbe Mnungu mna hawahitulwe.

42 Nawatowaga niyo wanda enga luvumbi lukwinulwa ni mp'heho,

naho nawajataga enga nt'hope yamwe sila.

43 Weye kuniyokola mwa wank'hondo wangu,

na kunitenda kilongozi ywe ziisi,

want'hu hiwamanyize wanidamanyilaga ndima.

44 Weze weve mbuli zo uhumi wangu nawanizumila,

watakwiza nawo wezaga na kunitunya,

45 watakwiza nawafa chevu,

wezaga wakazingiza kulawa mwa magomela yawe.

46 Zumbe Mnungu mdahi,

atunywe digomela dyo uyokozi wangu,

avikilwe Zumbe ywangu.

47 Yehe kanink'ha udahi wa kulihiza,

na kuwahuma want'hu wa si nt'huhu.

48 Aniyokolaga kulawa kwa wank'hondo wangu,

aninulaga mwa want'hu wakwank'walu,

na kuniyokola mwa wahigani wangu.

49 Ivo nohutunye mwe si,

Zumbe Mnungu neniditogole dizina dyako kwa kukema.

50 Mnungu amwink'ha seuta ywakwe uhumi mkulu,

na kumlagisa uwedi wakwe,

na kumvikila Daudi na welekwa wakwe.