1 Nenimtogole Mnungu kwa moyo wangu wose,

nenisimwiile mbuli zose za kweheela izo udamanye.

2 Neninde na kinyemi na kwanga kwajili yako,

weye Mnungu mkulu, nohutogole kwa kukema.

3 Umwo wanambizaga, wank'hondo wangu wauyaga kunyuma,

ho undiilo wako, wakobadika na kusila pele.

4 Kunitoanila mwe kindedi changu,

naho kwikala mwe difumbi dyako dyo ukulu,

na kulava usengelo wa uwagilwa.

5 Kuwafank'hila want'hu wa si,

kuwabananga waihi wose,

mazina yawe yajaligwa mazuwa yose.

6 Wank'hondo kuwabananga ulo na nulo,

kuimola imizi yawe,

nk'humbukila yawe haihali naho.

7 Mna Zumbe Mnungu niye seuta ywa mazuwa yose,

kaika fumbi dyakwe dyo ukulu vileke asengele.

8 Azisengela si kwa uwagilwa,

naho azilamula si uhuwilwa.

9 Zumbe Mnungu ni nk'hindilo kwa want'hu wakuhujilwa,

naho awadima lupisi lwa makunt'ho.

10 Wakukumanya Zumbe Mnungu, wakuhuwila,

weye Zumbe Mnungu hukuwaduula wadya wakukuzungula.

11 Mkemeleni nt'hogola Zumbe Mnungu akwikaila Sayuni,

wagambileni mbuli izo adamanye,

12 kwaviya Mnungu alihiza kikoda kwa wakomi,

naho hakujala ndilo ya wadya wakuhujilwa.

13 Unionele mbazi Zumbe Mnungu ywangu,

uwone makunt'ho ayo hupata kwa awo wakuniihiya,

ni weye ukudaha kuniyokola kulawa mwe file,

14 vileke nisimuile nt'hunyo yako mwa want'hu wa Sayuni,

nenange kwaviya kuniyokola.

15 Want'hu wa si wengila wenye mwe dibome wanisimbilaga,

wagwiligwa nu lwinika waufisile.

16 Zumbe Mnungu kakelaviliza ivo eli,

want'hu waihile wagwiligwa kwa udamanyi wawe wenye.

17 Want'hu waihile nawasiile kwe vikuta,

hamwenga na wose wakumjala Zumbe Mnungu.

18 Mna want'hu wakiwa hawajalwe mazuwa yose,

kawiilo dya wakuhujilwa hedyage hata zuwa.

19 Inuka Zumbe Mnungu!

Usekuzumila mnt'hu akubele,

uduganye si ho undiilo wako uzisengele.

20 Zumbe Mnungu uwatende wazingize kwa wogofi,

want'hu wa si wakombaganye kugamba woho ni want'hu du.